Ավելի վաղ հայտնել էինք, որ «Օքսֆամ Հայաստանյան գրասենյակը» և «Տնտեսական զարգացման և հետազոտությունների կենտրոնն այսօր «Հիլթոն» հյուրանոցում ներկայացրեցին «Ընտանիքի կենսամակարդակի բարձրացմանն ուղղված նպաստներ» և «Սոցիալապես անապահով և հատուկ խմբերում ընդգրկվածներին բժշկական օգնության ծառայություններ» բյուջետային ծրագրերի անկախ գնահատման արդյունքները:
Մասնավորապես երկրորդ ծրագրի հետազոտության արդյունքներով` հիվանդանոցային բժշկական օգնության ծառայություններ ստացած նպաստառուների 93 տոկոսը չի հանդիսացել ծայրահեղ աղքատ, 66 տոկոսը` շատ աղքատ, 31 տոկոսը` աղքատ: Ընդ որում, պետական պատվերի 31 տոկոսն ուղղվում է ոչ աղքատ, իսկ 66 տոկոսը` ոչ շատ աղքատ ընտանեկան նպաստների համակարգի նպաստառուների հիվանդանոցային բուժօգնության ապահովմանը:
Լրագրողների հետ զրույցում ՀՀ առողջապահության փոխնախարար Սերգեյ Խաչատրյանն անդրադարձավ հարցին, երբ է վերջապես պետպատվերը հասնելու կարիքավորներին:
«Հայտնի է, որ պետպատվերից օգտվում է մեր բնակչության ոչ միայն ապահով խավը, այլեւ հիմնականում` ոչ անապահով խավը: Մեր ամենամյա ծրագրերը կազմելուց մենք անպայման ընդգրկում ենք բնակչության հատուկ խմբերին, որոնց հատկացված գումարից որեւէ պաշտոնյա կամ ապահովված քաղաքացի օգտվել չի կարող: Յուրաքանչյուր ծրագիրն ունի իր շահառուները: Մենք ամեն տարի ծրագրերն ավելի հասցեական դարձնելու հնարավորությունները քննարկում ենք: Հարցը մեր ուշադրության կենտրոնում է»,-ասաց Խաչատրյանը:
Կարդացեք նաև
Նա նշեց, որ հետազոտության տվյալներին այս պահին ամբողջությամբ չի տիրապետում, բայց հիմնական եզրակացությունները կարեւորում է:
Լուիզա ՍՈՒՔԻԱՍՅԱՆ
