«Ես կարծում եմ, որ լայնամասշտաբ պատերազմ չի լինի»,- մայիսի 7-ին «Հայելի» մամուլի ակումբում լրագրողների հետ հանդիպման ընթացքում հայտարարեց արտակարգ եւ լիազոր դեսպան Արման Նավասարդյանը:
Սակայն, միաժամանակ նա համարում է, որ Ղարաբաղի կոնֆլիկտի շրջանակներում երկու կողմերն էլ կունենան տարածքային փոփոխություններ: Արման Նավասարդյանը նաեւ չբացառեց, որ տարածաշրջանում կարող է տեղի ունենալ պատերազմ. «Բանակցություն չկա, մոռացե՛ք, դիվանագիտությունն այսօր լռում է, այսօր խոսում են հրանոթները, վե՛րջ: Սա մենք պետք է լավ պատկերացնենք: Բայց ես գրեթե համոզված եմ, որ լայնամասշտաբ պատերազմ չի լինի, այսինքն՝ համաշխարհային պատերազմ չի լինի, որովհետեւ ոչ մի գերտերություն չի գնա դրան, անգամ Թուրքիան»:
Նա նկատեց, որ բացի այն, որ պատերազմի շեմին ենք կանգնած, Հայաստանի ներսում գաղափարական պատերազմ է գնում, եւ դրանից ժողովուրդը սկսում է կորցնել իր ճիշտ դատելու ունակությունը. «Ռուսաստանը հանի՞ իր զորքերն այստեղից, թե՞ չէ, ընդհանրապես այստեղ չլինի որեւէ մեծ տերության հովանավորություն կամ ազդեցություն: Ես կարծում եմ, որ դա կլիներ ամենալավ բանը, թո՛ղ Հայաստանը լիներ Շվեյցարիա, ո՞վ չէր ուզի դա, 102-րդ ռազմաբազան էլ հանեին, ՀԱՊԿ-ից էլ դուրս գայինք:
Կարելի է այս մտքից ուրախանալ եւ այս մտքի հետ հաշտվել մի դեպքում, եթե մենք զուգահեռաբար գանք այն եզրակացության, որ Թուրքիան բացարձակապես փոխել է իր քաղաքական դիրքորոշումը եւ իր փիլիսոփայությունը: Կարծում եմ, որ այդպիսի բան չկա, նամանավանդ, այսօր, երբ տեղի է ունենում ռադիկալիզացիա, երբ վարչապետը գնում է եւ մնում է այդ ոչ ադեկվատ երկրի ղեկավարը: Այնպես որ սա մեր խաչն է»:
Կարդացեք նաև
Ամի ՉԻՉԱԿՅԱՆ
