Թուրքիայի նախագահ Ռեջեփ Թայիփ Էրդողանը ելույթ է ունեցել Բալկանյան պետությունների Զինված ուժերի գլխավոր շտաբի ղեկավարների մասնակցությամբ 10-րդ գագաթաժողովի ընթացքում։ Այս մասին տեղեկացնում է թուրքական Haber sol լրատվական կայքը։
Նախագահ Էրդողանն իր խոսքում խիստ քննադատության է ենթարկել եվրոպական պետություններին՝ ասելով. «Եմենի, Սիրիայի թեմայով քայլեր չեն կատարվել։ Սիրիական ճգնաժամը դարձել է համաշխարհային խնդիր։ 600.000 մարդ է զոհվել, բայց ոչ մի քայլ չի կատարվել։ 3 միլիոն իրաքցու և սիրիացու էլ մենք (նկատի ունի Թուրքիային,-խմբ.) ենք տեր կանգնել»։
Թուրքիայի նախագահը կրկին փորձել է հավաստիացնել բոլորին, որ Թուրքիան անում է ամեն ինչ՝ փախստականների խնդիրները կարգավորելու համար. «Մենք 20 միլիարդ ԱՄՆ դոլար ենք ծախսել՝ փախստականների համար։ Նայեք Արևմուտքի դիրքորոշմանը՝ ինչքան հեռու է այն մարդկային վերաբերմունքից»։
Էրդողանն ասել է նաև, որ Թուրքիան միակ երկիրն է, որ պայքարում է «Իսլամական պետություն» ահաբեկչական խմբավորման դեմ, նշելով, որ այդ պայքարում Թուրքիային արդեն իսկ հաջողվել է չեզոքացնել 3000 ահաբեկչի։
Կարդացեք նաև
Իր խոսքում Թուրքիայի նախագահը խոսել է նաև ՆԱՏՕ-ի մասին՝ քննադատելով այդ կառույցին ոչ ակտիվ դիրքորոշում որդեգրելու համար։ Էրդողանը նշել է, որ ինքը առանձնապես չի կարևորում ՆԱՏՕ-ի գագաթաժողովը՝ ասելով. «ՆԱՏՕ-ի գլխավոր քարտուղարին էլ եմ ասել՝ սևծովյան տարածաշրջանում չկաք (նկատի ունի ՆԱՏՕ-ին,-խմբ.), այդ պատճառով էլ Սև ծովը ռուսական լիճ է դարձել»։
