Երեւանի Ազատության հրապարակում Ամանորի գիշերը ոստիկանի նկատմամբ բռնություն կիրառելու մեջ մեղադրվող ակտիվիստ Գեւորգ Սաֆարյանի գործով դատական նիստը քիչ առաջ հետաձգվեց. Դատարանը հեռացել է խորհրդակցության սենյակ փաստաբան Տիգրան Հայրապետյանի ներկայացրած միջնորդության վերաբերյալ որոշում ընդունելու:
Գեւորգ Սաֆարյանի պաշտպան՝ փաստաբան Տ. Հայրապետյանը Կենտրոն եւ Նորք Մարաշ վարչական շրջանների ընդհանուր իրավասության դատարանում Գեւորգ Սաֆարյանի խափանման միջոցը փոխելու միջնորդություն է ներկայացրել:
Պարոն Հայրապետյանն իր միջնորդությունը հիմնավորեց նրանով, որ այսօր դատարանում ուսումնասիրված ու մեղադրանքին առնչվող տեսանյութերում հստակ երեւում է՝ Գեւորգ Սաֆարյանին առաջադրված մեղադրանքն անհիմն է:
Ըստ նրա` կադրերում երեւում է, թե ինչպես է գործով տուժող ներկայացված ոստիկան Գեղամ Խաչատրյանը հարձակվում հավաքի մասնակիցների վրա, նրա ենթակաները բռնում են ձեռքերից եւ հեռացնում են, սակայն, նա նորից ազատվում է նրանց ձեռքերից եւ կրկին հարձակվում Գեւորգ Սաֆարյանի վրա:
Կարդացեք նաև
Փաստաբանը մեջբերեց նաեւ Գեղամ Խաչատրյանի ֆեյսբուքյան գրառումը, թե «գնում է Ազատության հրապարակ պահպանելու հասարակական կարգն այնտեղ զվռնող կապիկներից»: Ըստ փաստաբանի` Խաչատրյանը ֆեյսբուքյան գրառմամբ նաեւ վիրավորել է Գեւորգ Սաֆարյանին եւ նրա հարազատներին:
Հիշեցնենք, որ Գեւորգ Սաֆարյանը մեղադրվում է ոստիկանության աշխատակցի նկատմամբ բռնություն գործադրելու մեջ:
Արփինե ՍԻՄՈՆՅԱՆ
