Կառավարությունը, կարծես թե, իր խոստումները կատարում է. փորձում է ծախսեր կրճատել, տնտեսումներ անել՝ որոշ աշխատակիցներին զրկելով արտոնություններից:
Հունիսի 14-ի կառավարության նիստին կառավարությունը պատրաստվում է որոշում կայացնել ուժը կորցրած ճանաչել «Մշտական հիմունքներով պետական եւ ծառայողական գաղտնիք կազմող տեղեկությունների օգտագործմամբ աշխատանքներ կատարող քաղաքացիների եւ այդպիսի գաղտնիքի պաշտպանության կառուցվածքային ստորաբաժանումների աշխատողներին հատկացվող արտոնությունների մասին» N 487 որոշումը: Այս մասին տեղեկանում ենք կառավարության նիստի օրակարգից:
Բանն այն է, որ այս որոշումով պետական եւ ծառայողական գաղտնիք կազմող տեղեկությունների օգտագործմամբ աշխատողներին տրվում են լրացուցիչ աշխատավարձեր` պաշտոնային դրույքի 20 եւ 15 տոկոսի չափով: Բացի այս, նույն որոշմամբ նաեւ սահմանվում է լրացուցիչ վճարովի հնգօրյա արձակուրդ:
Եվ հիմա գաղտնի տեղեկություններին տիրապետող աշխատակիցներին, ըստ կառավարության որոշման նախագծի, գումարային եւ հանգստի արտոնություններից զրկում են:
Կարդացեք նաև
Կառավարության նախագծում նշված է, որ տվյալ որոշումը չեղարկելը կհանգեցնի պետական բյուջեի ծախսերի նվազեցման:
2015 թվականին գաղտնի տեղեկությունների հետ աշխատողներին հատկացվող այդ արտոնությունների համար պետական բյուջեից հատկացվել է 69.4 միլիոն դրամ, իսկ 2016-ին՝ 32.2 միլիոն դրամ. այս մասին կառավարության որոշման նախագծում է գրված:
Ի դեպ, այս որոշման նախագիծը մշակվել է ՀՀ վարչապետ Հովիկ Աբրահամյանի հունիսի տրված հանձնարարականի հիման վրա: Ըստ երեւույթին, կառավարությունը որոշել է վերջ դնել պետական ծառայողների ՝ պետբյուջեի հաշվին «ճոխություններին», բայց խնդիրն այն է, որ արդյոք հենց ամենաբարձր օղակների պաշտոնյաններին կզրկե՞ն նմանատիպ ճոխություններից:
Հիշեցնենք, որ վերջերս կառավարությունը, մեքենայի անիվների գնումների մասին էր հայտարարել պետական գնումների կայքէջում, ավտոմեքենայի անիվներից յուրաքանչյուրի արժեքն է 464.000 դրամ կամ 960 դոլար: Իսկ չորսը միասին արժեն 1,856,000 դրամ:
Փաստորեն կառավարության ղեկավարությունը ցածր օղակների «բերաններից» կտրում է, բայց բարձրաստիճան պաշտոնյանների համար շքեղ ծախսերը ոչ միայն չեն կրճատում, մի բան էլ ավելացնում են:
Նելլի ԲԱԲԱՅԱՆ
