Վերջին պատանդի ազատ արձակումից հետո շտապօգնությունը պատրաստակամություն է հայտնում «Սասնա ծռերին» բուժօգնություն տրամադրել միայն չեզոք գոտում եւ առանց զենքի առկայության։
Շտապօգնության ծառայությունը, որը ոստիկանության պարեկապահակային ծառայության գնդի տարածքում դրա գրավումից հետո սահմանել էր շուրջօրյա հերթապահություն, հուլիսի 23-ից սկսած հրաժարվել է այդ գործելաոճից՝ պատրաստակամություն հայտնելով անհրաժեշտության դեպքում «Սասնա ծռեր» խմբավորման անդամներին բուժօգնություն տրամադրել միայն չեզոք գոտում եւ առանց զենքերի առկայության։
«Շտապբուժօգնություն» ՓԲԸ տնօրեն Թագուհի Ստեփանյանը այդ փոփոխությունը պատճառաբանեց աշխատակիցներին սպառնացող վտանգով, երբ շաբաթ օրը լրագրողների հետ հանդիպման ժամանակ «Սասնա ծռերը» օդ են կրակել (ինչպես վերջիններս են հայտարարել՝ ի պաշտպանություն լրագրողների)։ Նա նաեւ նշեց, որ զինված խումբը քաշելով կամ հրելով տարածքից դուրս է հանել շտապօգնության ավտոմեքենան՝ այդ ընթացքում խփելով մեկ այլ ավտոմեքենայի եւ շարքից հանելով։
«Բուժօգնությունը միայն չեզոք գոտում տրամադրելու որոշում կայացնել ստիպեց նախ եւ առաջ վտանգը։ Լսել եմ, որ կրակոցներ են եղել օդ, մեր մեքենան շատ լուրջ վնասվել է, այսինքն՝ ինչ-որ գործողություններ են կատարվում, որոնց արդեն ես չեմ կրող ոչ մի բացատրություն տալ, դրա համար էլ վտանգի տակ դնել մարդկանց կյանքը եւ այլն… Իրենք էլի պատրաստ են բուժօգնություն ցուցաբերել, բայց ինչ պարտադիր է հենց ներսում դա անել, թող չեզոք գոտում լինի, որտեղ «Սասնա ծռեր» խմբի անդամները ազատ ելումուտ ունեն։ Դուրս են եկել, չէ՞, լրագրողների հետ հանդիպելու, զրուցելու։ Մենք էլ պատրաստ ենք այդ նույն տեղում օգնություն ցուցաբերել։ Ինձ թվում է՝ այդտեղ ոչ մի սարսափելի բան չկա։ Եթե կարիքը կա, մեր անձնակազմը կարող է մոտենալ այնտեղ եւ համապատասխան օգնություն ցուցաբերել այնտեղ՝ առանց զենքի առկայության, իհարկե»,- ասաց Թագուհի Ստեփանյանը։
Կարդացեք նաև
Ինչ վերաբերում է շտապօգնության ավտոմեքենային, ապստամբները, ըստ նրա, դա դուրս են հանել կիրակի, իսկ բուժանձնակազմն այդ ժամանակ արդեն չի եղել գնդի տարածքում։ Ստացվում է՝ շաբաթ օրը, երբ «Սասնա ծռերն» ազատ է արձակել վերջին երկու պատանդ բարձրաստիճան ոստիկաններին, շտապօգնության աշխատակիցները նույնպես հեռացել են տարածքից, ինչից հետո խմբավորման անդամները ազատվել են նաեւ նրանց ավտոմեքենայից։
Աննա ԶԱԽԱՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
