Ինչպես արդեն տեղեկացրել ենք, Վերաքննիչ քրեական դատարանը մերժել է «Սասնա ծռեր» խմբավորման անդամ Հովհաննես Հարությունյանին ազատ արձակելու մասին բողոքը:
Նրա պաշտպան Արայիկ Պապիկյանը Aravot.am-ին հայտնեց, որ այցելել է «Դատապարտյալների հիվանդանոց» ՔԿՀ-ում գտնվող Հովհաննես Հարությունյանին. «Ինձ մոտ այնպիսի տպավորություն է, որ Հովհաննեսի վերքերն ավելի վտանգավոր ու անհանգստացնող են: Բայց նույնն է վիճակը, որեւէ խնդիր չկա»:
Նա մեզ հայտնեց, որ շուտով այցելելու է նաեւ խմբավորման անդամ Արայիկ Խանդոյանին. «Իր ակնոցների հետ կապված հարցն արդեն լուծվել է, այսօր Հատուկ քննչական ծառայությունից ստացել եմ, պետք է տանեմ, իրեն փոխանցեմ»:
Արայիկ Պապիկյանը ընդգծեց, որ «Սասնա ծռեր» խմբավորման գործով զբաղվող փաստաբանական խմբի անդամները իրենց մասնագիտական պարտականությունները կատարում են իրենց ուժերի առավելագույն չափով. «Զարմանալի չէ մեր դատական համակարգում նման որոշումներ կայացնելը, մենք դա զգացինք հենց առաջին ատյանի դատարանում: Ոչի՛նչ, Վերաքննիչը այդպես է մտածում, թո՛ղ այդպես անի. կան իրավական այլ մեխանիզմներ՝ կա՛ Վճռաբեկ դատարան, կա՛ Եվրոպական դատարան: Մենք մեր առավելագույն ջանքերը պետք է գործադրենք»:
Կարդացեք նաև
Ամի ՉԻՉԱԿՅԱՆ
