Գերմանիայի կառավարությունը պատրաստվում է հեռու քաշվել Բունդեսթագի կողմից Հայոց ցեղասպանության ճանաչման բանաձևից՝ դրանով «քաղաքական ժեստ» կատարելով Թուրքիայի նկատմամբ: Այս մասին հաղորդում է գերմանական Der Spiegel թերթը՝ վկայակոչելով սեփական աղբյուրները:
Ըստ այդ տեղեկատվության՝ կառավարության պաշտոնական ներկայացուցիչ Շտեֆան Զայբերգը հանդես կգա հայտարարությամբ այն մասին, որ բանաձևի ընդունումը «պարտադիր ուժ չունի կառավարության համար», այլ «Բունդեսթագի քաղաքական հայտարարությունն է՝ առանց իրավական նշանակության»:
Գերմանիայի իշխանությունները սպասում են, որ ի պատասխան այդ քայլի՝ Թուրքիան գերմանացի պատգամավորներին թույլ կտա մուտք գործել Ինջիրլիք ավիաբազա, գրում է gazeta.ru-ն:
Հիշեցնենք, հունիսի 2-ին Բունդեսթագը ձայների զգալի մեծամասնությամբ ընդունեց բանաձև՝ ճանաչելով 1915թ. Օսմանյան կայսրությունում հայերի դեմ իրականացված Ցեղասպանությունը, ինչից հետո Գերմանիայի և Թուրքիայի հարաբերությունները վատթարացան, և Անկարան հրաժարվեց գերմանացի պատգամավորներին թույլ տալ մուտք գործել Ինջիրլիք:
Կարդացեք նաև
Անցյալ շաբաթ Գերմանիայի կանցլեր Անգելա Մերկելը հայտարարեց, որ Գերմանիայի իշխանությունները բանակցություններ են վարում Թուրքիայի հետ՝ Բունդեսթագի պատգամավորների մուտքը Ինջիրլիք կազմակերպելու ուղղությամբ, որն իրականացվում է «Իսլամական պետություն» ահաբեկչական կազմակերպության դեմ միջազգային կոալիցիայի գործողությունների շրջանակում:
Պատրաստեց՝ Վիկտորյա ԱՆԴՐԵԱՍՅԱՆԸ
