Արդեն պատրաստ է «Ոստան հայոց» ռոք խմբի «Արցախ լսիր» տեսահոլովակը, որի պրոդյուսերն է Սուրեն Սարգսյանը, ռեժիսորը՝ Արփի Մաղաքյանը:
Aravot.am-ի հետ զրույցում Սուրեն Սարգսյանը նշեց, որ երգը ստեղծվել է Արցախյան գոյամարտի տարիներին, այսինքն՝ շուրջ 25 տարի առաջ: «Ոստան հայոցի» այս երգը բավականին հայտնի է, խոսքերն ու երաժշտությունն էլ հենց «Ոստան հայոցինն» են: Տղաները շատ են նվագել այն տարբեր համերգների ժամանակ, եւ միշտ ոգեւորիչ երգ է եղել: Քանի որ «Ոստան հայոց» խումբը բավականին երկար տարիներ ակտիվ գործունեություն է ծավալել, որոշեցինք Արցախի 25-ամյակին նվիրված գեղեցիկ տեսահոլովակ նկարել»,-հայտնեց պրոդյուսերը:
Նա հավելեց, որ տեսահոլովակը ստեղծարար ու ինքնատիպ դարձնելու համար հետաքրքիր լուծում են մտածել. «Նախ ուզում էինք գեղեցիկ ձեւով կապել Արցախը եւ Հայաստանը, միաժամանակ մտածեցինք, որ բեյսջամփերների (բեյսջամփինգ. թռիչք` ֆիքսված օբյեկտներից հատուկ պարաշուտով.խմբ)՝ վերեւից թռիչքը շատ լավ կնայվի ռոք երաժշտության ներքո: Մենք նրանց ամրացրինք տեսախցիկներ, վերցրինք մեր տեղախցիկները եւ սկսեցինք նկարահանել բեյսջամփերների թռիչքները:
Կարդացեք նաև
Ամենահետաքրքիրն այն է, որ երեք բեյսջամփերները, որոնք Արցախի դրոշով թռչում են բարձրությունից դեպի ներքեւ եւ վայրէջք կատարելուց հետո դրոշը հանձնում են երեխաներին, որոնք էլ՝ «Ոստան հայոցի» տղաներին, օտարերկրացիներ են: Նրանք Ֆրանսիայի, ԱՄՆ-ի եւ Ռուսաստանի քաղաքացիներ են, այսինքն՝ Մինսկի խմբի համանախագահ երկրների քաղաքացիներ: Իմիջիայլոց, դա չէինք պլանավորել, անսպասելի ստացվեց այդ լուծումը»:
Սուրեն Սարգսյանի ձեւակերպմամբ, տեսահոլովակի ուղերձը բանաձեւած է երգի խոսքերում. «Երգի խոսքերը հզոր են, երբ ասվում է՝ արյան ծովում պետք է խեղդվենք, բայց փառքը քո պիտի բարձր պահենք: Այսինքն՝ ինչ էլ լինի, ինչ զարգացումներ էլ, որ լինեն, միեւնույն է՝ Արցախը ճանաչվելու է որպես անկախ պետություն: Սա մեծ հաշվով համայն հայության ցանկությունն է: Ուղերձն այն է, որ ամեն ինչ մի կողմ ենք դնելու եւ պայքարելու ենք ազատ եւ անկախ Արցախի համար»:
Գոհար ՀԱԿՈԲՅԱՆ
Ինչ հետաքրքիր ա, որ մի պետության մարդիկ էսքան ուրախություն են ապրում մեկ այլ պետության խորհրդանիշներից: Ի նկատի ունեմ, որ հայաստանցիները հրճվում են այսպես կոչված ԼՂՀ-ի դրոշ-մրոշից: Երեւի թե էդքան չուրախանային Ղարաբաղը ՀՀ-ի մարզերից մեկը լինելու փաստից, ինչքան որ ուրախանում են Ղարաբաղն այլ երկիր տեսնելու մտքից: Եղբայր, որ էդքան ուրախանալու բան ա դա, խի չեք Լոռին, Շիրակը սարքում այլ պետություն ու ուրախանում դրանից: Հլը պատկերացրեք, թե քանի պետություն կարաք սարքեք ու ինչ քեֆեր կարաք անեք: Դրոշների, պրեզիդենտների ինչ համաստեղություն կարաք ստեղծեք: Թե չէ մի հատ ԼՂՀ՝ էն էլ չճանաչված, բա էղա՞վ: