Հոգեբան Սամվել Խուդոյանի վերլուծությամբ, հանրային որոշակի վերաբերմունք արդեն կա նախկին վարչապետի՝ Հովիկ Աբրահամյանի հրաժարականի վերաբերյալ:
«Այդ վերաբերմունքը արտահայտված է որոշակի դեպքերում՝ հավանության որոշ դեպքերում՝ անտարբերության ձեւով: Հովիկ Աբրահամյանի կերպարը դրական չէր, խիստ բացասական էր, նրան ընկալում էին որպես պաշտոնով հարստացած եւ կոռուպցիոն համակարգի ներկայացուցիչ, հույսեր չէին կապում՝ որպես բարեփոխում իրականացնողի հետ: Խոսակցություններ տարածվեցին, որ իր բարեկամներին է այս կամ այն պաշտոնի դրել, մի խոսքով, նրա կերպարը խիստ բացասական է»,- այսօր «Երկու երես» ակումբում ասաց հոգեբանը:
Ըստ նրա, վարչապետի հրաժարականը տեղին էր. «Լարվածությունը «Սասնա ծռերի» գործողություններից հետո ոչ միայն չէր թուլացել, այլեւ կուտակվում էր, ու աշնանը պայթյունի հավանականություն կար: Այս քայլը որոշակի թուլացրեց լարվածությունը, գցեց ժողովրդին անորոշության մեջ»:
Հոգեբանը նոր վարչապետի թեկնածու Կարեն Կարապետյանի մասին խոսելիս, ասաց, որ նա Հովիկ Աբրահամյանի իմիջը չունի, հակառակը՝ նրա նկատմամբ վերաբերմունքն ավելի դրական է. «Չնայած որ Կարեն Կարապետյանն էլ ընկալվում է ռուսական գծի, կողմի ներկայացուցիչ, դրա համար էլ քննադատվում է «Գազպրոմը» որպես կոռումպացված կազմակերպություն:
Կարդացեք նաև
Ընդհանուր առմամբ, նա անորոշ ու դրական երանգներով կերպար է, կարծում եմ՝ նա նաեւ Սերժ Սարգսյանի ծրագրերում որպես հետնորդ է դաստիարակվում, հատկապես եթե հաջողի ծրագրերը»:
Պարոն Խուդոյանի խոսքով, եթե կտրուկ գործողություններ լինեն եւ կոռուպցիայի եւ այլ հարցերում, ու ժողովուրդը համոզված լինի, որ իսկական պայքար է գնում, եւ ոչ թե աչքակապություն, ապա. «Նոր վարչապետն ամեն ինչ կանի, որ ժողովրդի սիրտը շահի ու այդ հողի վրա գնա որպես հաջորդ ղեկավար, ՀՀԿ-ի իմիջն էլ կբարձրանա ու կարեւոր դեր կարող է նա խաղալ»:
Արփինե ՍԻՄՈՆՅԱՆ