Ինչպես տեղեկացրել էինք, ամռանը Սեւանա լճում փրկվել է 21 քաղաքացի, ընդ որում` նրանց կեսը եղել է ոչ սթափ վիճակում: «Sputnik Արմենիա» մամուլի կենտրոնում ՀՀ ԱԻՆ հատուկ ջրափրկարարական ջոկատի հրամանատար Արմեն Ճզմաչյանը մանրամասնեց, որ դեպքերից մեկը գրանցվել է Դրախտիկ համայնքի տարածքում: Մի քանի երիտասարդ ափի մոտ առանց ձկնորսին հարցնելու` վերցրել են վերջինիս մոտորանավակը եւ մտել ջուրը: Մոտորանավակի շարժիչը խափանվել է, քամին նրանց քշել է Սեւանա լճի խորքը: Արդյունքում, փրկարարները նրանց հայտնաբերել են ափից 3 կմ խորության վրա եւ փրկել:
Հետաքրքրվեցինք` նրա՞նք էլ էին ոչ սթափ վիճակում: Արմեն Ճզմաչյանը պատասխանեց. «Փոքր ինչ գինովցած վիճակում էին»: Միաժամանակ, Ճզմաչյանը նկատեց, որ 911 ծառայության հանդեպ վստահությունը տարեցտարի ավելանում է, մարդիկ էլ ավելի զգույշ են եւ լսում են փրկարարների ցուցումները:
Բանախոսը հիշեցրեց, որ ՀՀ տարբեր մարզերի ջրային տարածքները նախատեսված չեն լողի համար. «Ցանկացած ջրային տարածքում պահպանեք անվտանգության կանոնները` ոչ սթափ եւ շատ սնունդ ընդունած վիճակում մի մտեք ջուրը: Ջրային տեխնիկայի վրայից մի ցատկեք ջուրը, իսկ հոսող ջրերում եւ գետերում ընդհանրապես չի կարելի լողանալ»:
Լուիզա ՍՈՒՔԻԱՍՅԱՆ
