Ընտրական օրենսգրքում փոփոխությունների նախագծի քննարկման ժամանակ ՀՀԿ խմբակցության ղեկավար Վահրամ Բաղդասարյանը դիմեց ընդդիմադիրներին, որոնք բողոքում են ՏԻՄ ընտրություններից: Նաիրա Զոհրաբյանն իր ելույթում խոսել էր բոնուսների մասին, որ ինչ-որ հանելուկով դարձնում են քաղաքապետ:
Վահրամ Բաղդասարյանի խոսքերով՝ պարզ թվաբանություն է, Միքայել Մելքումյանին ուղարկեք, այդ բանաձեւը մի փոքր ուսումնասիրի. «Բալասանյան Սամվելը մեղավո՞ր է, որ բոնուսների հաշվին ինքը 18 ձայն է հավաքել: Այստեղի մթնոլորտը մի ուղարկեք Գյումրի, թողեք իրենց աշխատանքը կարգավորեն: Վանաձորի հետ կապված՝ ձեր ավագանու ցուցակները գնացեք եւ ուշադիր նայեք՝ քանի՞ քաղաքական մարդ կա, որ գաղափարական մոտեցումներից եք խոսում: Ձեր ցուցակներում մի ընտանիքից 3 տարբեր մարդիկ տարբեր ցուցակներում են: Ընդ որում, շատ ամուր ընտանիքներ են, նրանց խոսքը մեկ է: Եթե դուք այնքան քաղաքական կամք ունենայիք եւ այդ ցուցակները կազմեիք քաղաքական մարդկանցով եւ նախքան ընտրությունները կազմեիք կոալիցիա, իրավունք ունեիք պահանջելու, որ այդ մարդիկ քաղաքական պայմանավորվածությունները խախտեցին;
Քաղաքական պայմանավորվածությունները խախտում են քաղաքական գործիչները՝ այստեղի ԱԺ-ի փակ ընտրություններին: Սկսեք այստեղից: 3-4 ուժեր հայտարարում են, որ իրենք դեմ են քվեարկելու, քվեատուփերը բացելուց հետո՝ 98 ձայն կողմ է լինում, 107 ձայն, բայց ՀՀԿ խմբակցությունը 70 մարդ է: Այդ խախտումները այստեղ են կատարվում, ոչ թե վանաձորցիներին գնաք ասեք՝ էս ի՞նչ խախտումներ արեցիք:
Կարդացեք նաև
Դուք մեկ օրվա, մեկ ժամվա քաղաքական ամուսնությունով չեք կարող հանրությանը խաբել, ժողովրդին մոլորության մեջ գցել: Խնդրում եմ քաղաքական աղտոտված ձեռքերը հեռու պահել լոռեցիներից: Լոռեցիներին պիտակներ մի տվեք: Նրանք գնացել են իրենց ավագանու ցուցակում ընդգրկվելու, չեն գնացել ձեր քաղաքական երազանքներն ի կատար ածելու: Ասում եք՝ ոչ իշխանական ուժեր՝ ձեզ երբ պետք է՝ իշխանական եք, երբ պետք է՝ կիսաիշխանական եք: Մի հատ կողմնորոշվեք»:
Նա ասաց, որ մեկ գիշերվա ընթացքում 3-4 հոգի հուշագիր են ստորագրում եւ Երեւանից գնում են Վանաձոր ու ասում՝ «գյադեք, էս յան, գյադեք, էն յան». «Չեք կարող լոռեցիներին այսպես պարտադրել: Ասում եք՝ նրանք դավաճանում են մեր քաղաքական մոտեցումներին: Նրանք դավաճաններ չեն, չեք կարող նրանց թելադրել: Այլ խնդիր է, եթե ձեր ցուցակները ճիշտ կարողանայիք կազմել: Մի գիշերվա մեջ եկել ասում են՝ եկեք ամուսնանանք իրար հետ ու էս տղերքին խաբենք: Նրանք չեն խաբվում, քաղաքական մարդիկ չեն: Այդ մարդիկ չեն կարող լինել այդ կաթսայում, չեն եփվի»:
Նա վստահեցրեց, որ ՀՀԿ-ն մարդագողությամբ չի զբաղվում, այդ ընդդիմությունն է զբաղվում մարդաորսությամբ, մինչդեռ պետք է լավ ուսումնասիրեր իր ցուցակը ու տեսներ՝ ում համար են առաջ այդ մարդիկ աշխատել. «Մեր աճեցրած մարդկանց հաշվին այդ ձայները դուք ունեցաք»:
Հռիփսիմե ՋԵԲԵՋՅԱՆ
