Կապիտան Արմենակ Ուրֆանյանի մայրը՝ տիկին Համեստը հաշտվել էր, որ Արմենակը միայն իր որդին չէ, նաեւ բանակի տղան է: Որդու զոհվելուց հետո, մայրը մեկնել է Արցախ՝ Մարտակերտ, որտեղ որդին ծառայություն է իրականացրել: Այս մասին պատմեց Արմենակ Ուրֆանյանի հիշատակին նվիրված ֆիլմը, որի ցուցադրությունն այսօր էր «Մոսկվա» կինոթատրոնում:
Հուշ-երեկոն կազմակերպել էր «Ջավախք հայրենակցական միությունը»: Միության նախագահ Շիրակ Թորոսյանը վստահեցրեց, որ մեկ առ մեկ հիշելու են բոլոր այն հերոսներին, որոնք հերոսաբար ընկան ապրիլյան պատերազմում: Կինոթատրոնի դահլիճը լեփ լեցուն էր եւ դատարկ աթոռների բացակայության պատճառով տասնյակ քաղաքացիներ ոտքի վրա էին հետեւում իր կյանքը հայրենիքի համար զոհաբերած կապիտանի կյանքի պատմությանը:
Մայրը հիշում էր, որ դեռ փոքրուց Արմենակը խաղալիքներ ընտրելիս էլ զենքի տեսքով խաղալիքներն էր նախընտրում եւ արդեն 8-9-րդ դասարանում որոշում, որ զինվորական է դառնալու:
Կարդացեք նաև
Շիրակ Թորոսյանի խոսքերով, ապրիլյան պատերազմը ցույց տվեց, որ Հայաստանը գործ ունի «անկանխատեսելի եւ ագրեսոր պետության հետ», սակայն պարոն Թորոսյանը գտնում է, որ մեր հերոսների սխրագործությունները վկայեցին, որ «անիմաստ է Հայաստանի հետ ուժի լեզվով խոսելը»:
«Արմենակ Ուրֆանյանը Մարտակերտում մինչեւ վերջ կրեց իր խաչը եւ նրա դաստիարակած զինվորները արժանին էին իրենց ուսուցչին՝ մինչեւ վերջ կռվելով եւ չնահանջելով»,-ասված էր պաշտպանության նախարարի խոսքում, որն ընթերցվեց երեկոյի ընթացքում:
Ռոբերտ Աբաջյան, Քյարամ Սլոյան եւ ապրիլյան պատերազմից հայտնի այլ անուններ, կապիտան Ուրֆանյանի զինվորներն են եղել:
Հուշ-երեկոյին նաեւ ներկա էին ԱԺ պատգամավորներ Կարինե Աճեմյանը, Վահրամ Բաղդասարյանը, Կորյուն Նահապետյանը, հասարակական-քաղաքական գործիչներ:
Թիվ 35 դպրոցի տնօրեն Արարատ Սարյանը, որտեղ հաճախել է կապիտան Ուրֆանյանը, ասաց, որ դպրոցի հրաձգարանը անվանակոչվելու է Արմենակ Ուրֆանյանի անունով:
Լուսինե ԲՈՒԴԱՂՅԱՆ
