Մարդու իրավունքների Եվրոպական դատարանն ընդունել է արդեն մեկ տարի կալանավայրում գտնվող պաշտպանության նախկին փոխնախարար Վահան Շիրխանյանի պաշտպանների դիմումը: Նորք-Մարաշում մեկ տարի առաջ վնասազերծված զինված խմբի գործով մեղադրվող Շիրխանյանի պաշտպան Հայկ Ալումյանն «Ազատությանն» ասաց՝ Ստրասբուրգյան դատարանը որոշել է արագացված ընթացակարգով քննել դիմումը:
Պաշտպանները ներկայացված դիմումում պնդել են, որ Հայաստանի կառավարությունը խախտում է Եվրոպական կոնվենցիան՝ պաշտպանության նախկին փոխնախարարին խոշտանգում են բանտում՝ հրաժարվելով տեղափոխել քաղաքացիական հիվանդանոց։
«Ինքը արդեն 4 ամիս է՝ չի կարողանում լողանալ, որովհետև պետք է իջնի աստիճաններով, բայց ինքնուրույն չի կարող իջնել։ 8 ամիս է՝ դուրս չի գալիս զբոսանքի՝ առանց մաքուր օդի և արևի լույսի է», – պատմեց փաստաբանը:
Հանցավոր համագործակցությանը մասնակցելու և դրա օգտին գործելու մեջ մեղադրվող Շիրխանյանի շահերի պաշտպանն ահազանգում է՝ 69-ամյա տղամարդն արդեն ունի ոչ թե առողջության պահպանման, այլ կյանքի խնդիր։ Նախկին փոխնախարարի մոտ պաշտոնապես 9 հիվանդություն է հայտնաբերվել՝ ընդ որում, դրանցից մեկը առնչվում է անոթներին և ըստ պաշտպանի՝ անհամատեղելի է բանտային պայմանների հետ։ Ալումյանի խոսքով՝ կալանավորման պահին 3 հիվանդություն ունեցող Շիրխանյանը բանտում նորերն է ձեռք բերել, և արդեն մեկ ամիս է՝ հրաժարվում է դեղորայք ընդունել: Հայկ Ալումյանն ահազանգում է՝ այսպես շարունակվելու դեպքում Շիրխանյանը չի կարողանա մասնակցել դատական նիստերին։
Կարդացեք նաև
Նաիրա Բուլղադարյան
Նյութն ամբողջությամբ՝ սկզբնաղբյուր կայքում
