«Ադրբեջանի մոտ իրավիճակի վրա ազդելու այլ միջոց չկա: Երկու միջոց ունեն՝ խոսքերը, հայտարարությունները, որոնք արդյունավետ չեն, եւ կրակելը՝ որպես ուշադրություն գրավելու միջոց»,-«Արմենպրես»-ում լրագրողների հետ հանդիպմանն ասաց քաղաքագետ Ալեքսանդր Իսկանդարյանը:
«Պատկերացրեք՝ դուք Ադրբեջանի ղեկավարությունն եք եւ չկրակելու հրաման եք տալիս: Ո՞վ է այդ դեպքում ձեզ հիշելու, որովհետեւ միջազգային հանրությունը հանձինս, օրինակ, Սիրիայի, Ուկրաինայի, շատ խնդիրներ ունի: Կրակելը պետք է Ադրբեջանին, դա հիշեցնում է աշխարհին եւ ադրբեջանցիներին, որ «ահա վաղը մենք հաղթելու ենք». ցավոք, այդ ամենից եզրակացնում եմ՝ դժվար է պատկերացնել, որ իրավիճակը կտրուկ կփոխվի, Ալիեւն էլ մի օր կարթնանա ու կորոշի, որ չպետք է կրակել: Դա իր միակ միջոցն է»,-նկատեց քաղաքագետը:
Խոսելով դիվերսիայի շուրջ ՀԱՊԿ գլխավոր քարտուղարության հայտարարության մասին, Ալեքսանդր Իսկանդարյանը համոզմունք հայտնեց, որ ՀԱՊԿ գլխավոր քարտուղար Նիկոլայ Բորդյուժայի խոսքերը Ադրբեջանի վրա ազդելու տարրերից են. «Դրանք պատասխան արձագանք են այն հանգամանքին, որ Ադրբեջանը չի պահում պայմանավորվածությունները: Ապրիլից հետո որոշակի փակ պայմանավորվածություններ էին ձեռք բերվել, իսկ ՌԴ-ն դրանում մեծ մասնակցություն էր ունեցել: Իրական չէ մտածել, որ Ադրբեջանը հետամուտ է լինելու պայմանավորվածությունների պահպանմանը»:
Քաղաքագետն ընդգծեց, որ ՀԱՊԿ յուրաքանչյուր երկիր իր շահերն ունի. «Արցախն, օրինակ, ՌԴ-ի քաղաքական օրակարգի կիզակետում չէ, ավելի կարեւոր հարցեր կան: Այնպես որ, ոչ մի քաղաքական կառույցի պետք չէ հավատալ»:
Կարդացեք նաև
Լուիզա ՍՈՒՔԻԱՍՅԱՆ
