Էրեբունի վարչական շրջանի հոգևոր հովիվ Տեր Զգոն քահանա Աբրահամյանը խորհուրդ է տալիս տարին սկսել Աստծո հետ:
«Ապավինել Աստծուն, որը ամենակարող է ու կարող է օրհնել բոլորիս ընթացքը ու բարի պտուղներ բերել բոլորիս կյանքում: Յուրաքանչյուր տարի ունենում է իր ձեռքբերումներն ու կորուստները, երկրային կյանքը փորձության շրջան է : Դժվարությունները հաղթահարելով՝ մոտենում ենք Աստծուն ու կատարելագործվում ենք»,- այսօր «Հայացք» ակումբում ասաց քահանան:
Սթրեսի և Ցավի կառավարման կենտրոնի ղեկավար Սոնա Հարությունյանն էլ նկատեց, որ նախորդ տարին ամփոփելիս պետք է հիշել այն բոլոր ձեռքբերումները, որոնք ունեցել ենք, որովհետեւ. «Դրական, հուզական վիճակի ապահովումը տալիս է հոգեբանական դրական տրամադրվածություն դեպի նոր տարի: Ընդհանրապես, երբ խոսում ենք սպասելիքների ու դրանց արդարացման մասին, մարդիկ սպասում են, որ տարվա հենց առաջին օրն այդ սպասելիքները պետք է արդարանան: Եվ դա է հենց լինում պատճառը, որ ունենում են հետտոնական սթրեսներ ու հիասթափության, դատարկության զգացում: Բայց սպասելիքների արդարացմանը պետք է ձգտել ողջ տարվա ընթացքում»:
Արփինե ՍԻՄՈՆՅԱՆ
