Ներսես Պողոսյանի իրավունքն է՝ հացադուլ անելով ուշադրության արժանանալ: Պողոսյանի բողոքի ծայրահեղ ակցիայի 28-րդ օրը վերջինիս այդ քայլին «Ազատության» հետ զրույցում այսպես արձագանքեց Գլխավոր դատախազ Արթուր Դավթյանը:
Երեկ մարտական դիրքեր այցելած Դավթյանը լրագրողների հետ հանդիպման ժամանակ, ըստ էության, ակնարկեց, որ դատախազությունը չի վերանայելու Պողոսյանի խափանման միջոցը:
«Դատախազությունը, բնականաբար, ցանկացած խափանման միջոցը կալանք ընտրված անձի հիմնավորումներին անդրադառնում է պարբերաբար: Այդ թվում՝ նաև Ներսես Պողոսյանի գործով: Եվ, բնականաբար, իր իրավունքն է՝ ուշադրության արժանանալ այս առումով: Բայց քրեական գործով ձեռք բերված հիմքերի բավարարությունը մշտապես դատախազության ուշադրության կենտրոնում է»,- ասաց գլխավոր դատախազը:
Ներսես Պողոսյանը հենց դատախազին ու քննչական մարմնին էր ներկայացրել իրեն ազատ արձակելու պահանջը, քանի որ արդեն մերժվել էր դատական երկու ատյաններում, իսկ վճռաբեկ դատարանը կընդունի դիմումը թե ոչ՝ այդ հարցը պարզելու համար ամիսներ կպահանջվեն:
