Թալիշում ծանր վիրավորում ստացած զինծառայող Ռոլանդ Սահակյանը, որին Aravot.am-ը երեկ անդրադարձել է, արտերկրում բուժօգնության կարիք ունի:
Հիշեցնենք, որ Ռոլանդ Սահակյանին 12 անգամ վիրահատել են, նա ողնաշարի վիրավորում ուներ: Երիտասարդը հուսով է, որ արտերկրի կլինիկայում բուժվելուց հետո կկարողանա ոտքը գետնին դնել:
Հիշեցնենք նաեւ, որ օրերս առողջապահության նախարարության բուժօգնության քաղաքականության վարչության պետ Ծաղիկ Վարդանյանը վստահեցրել էր՝ «Արտերկրում զինծառայողների բուժման համար ֆինանսական հարցերը լուծված են»: Տիկին Վարդանյանը հավաստիացրել էր, որ արդեն 5 զինծառայողների հարց է քննարկվել, որից 3-ին դրական պատասխան է տրվել, 2 զինծառայողների համար էլ դեռ ժամանակ կա սպասելու:
Aravot.am-ը տիկին Վարդանյանից հետաքրքրվեց՝ արդյոք Ռոլանդ Սահակյանի հարցը քննարկվել է, եւ չե՞ն պատրաստվում աջակցել զինծառայողին՝ արտերկրում բուժումը շարունակելու համար:
Կարդացեք նաև
Այս առնչությամբ տիկին Վարդանյանն ասաց. «Ռոլանդը զինվորական հոսպիտալում է, այն պահին, երբ նրա վերականգնողական բուժումը հոսպիտալում կվերջանա, փաստաթղթերի փաթեթը կգա մասնագիտական եզրակացություն տալու եւ որոշումը կկայացվի մասնագետների կողմից»:
Ծաղիկ Վարդանյանը վստահեցրեց՝ եթե մասնագիտական եզրակացությամբ հաստատվի, որ անհրաժեշտություն կա բուժօգնությունը համապատասխան կլինիկայում ՝ արտերկրում շարունակելու, մյուսների պես Ռոլանդը նույնպես կգնա:
«Առաջարկում եմ դիմեն պաշտպանության նախարարություն եւ պնդեն՝ անպայման մասնագիտական հանձնաժողովի հետ միասին աշխատելով: Եթե հանձնաժողովը որոշի, որ Հայաստանում այլեւս հնարավոր չէ համապատասխան բուժում ստանալ, կորոշվի ուղարկել արտերկիր: Թող պնդելով դիմեն պաշտպանության նախարարություն»,-ասաց տիկին Վարդանյանը:
Մանրամասն՝ տեսանյութում
Հիշեցնենք, որ նախկինում տիկին Վարդանյանը պատասխանելով Aravot.am-ի հարցին՝ արդյոք չե՞ն կրկնվի Արման Լազգիյանի եւ Ռոբերտ Առաքելյանի դեպքերը, որոնք ապրիլյան պատերազմից հետո ծանր վիրավորում էին ստացել, կառավարությունը խոստացել էր նման զինծառայողների բուժումը արտերկրում իրականացնել, սակայն, նրանք այժմ բուժումը շարունակում են Գերմանիայում բարեգործության հաշվին, ոչ պետական ֆինանսավորմամբ, Վարդանյանը վստահեցրել էր՝«Ոչ, նման դեպքերը չեն կրկնվի, որովհետեւ ֆինանսների հայթայթման մեխանիզմները կառավարության որոշումով կարգավորված են»:
Նելլի ԲԱԲԱՅԱՆ
