Նախկին ՕԵԿ-ական, այսօր ՀՀԿ-ական Արտակ Սարգսյանը, որը հանրության շրջանում առավել հայտնի է «ՍԱՍ»-ի Արտակ մականունով, մեր տեղեկություններով, որեւէ լծակ չի խնայում կրկին պատգամավոր դառնալու համար:
Ուշագրավ է, որ Արտակ Սարգսյանը նախորդ 5 տարիների ընթացքում ոչ մի անգամ որեւէ օրենսդրական նախաձեռնությամբ հանդես չի եկել, անգամ` Ազգային ժողովում հարց չի հնչեցրել, իսկ նիստերին մասնակցել է միայն քվեարկություններին մասնակցելու համար:
Ինչպես տեղեկացնում են մեր աղբյուրները, Արտակ Սարգսյանին փորձում է օգնել Երեւանի քաղաքապետարանը. մանկապարտեզների եւ դպրոցների տնօրեններին ներքին կարգով հանձնարարում են աշխատել հենց Արտակ Սարգսյանի օգտին:
Զրուցեցինք Արաբկիր վարչական շրջանում գտնվող մանկապարտեզների տնօրենների հետ: Թիվ 24 մանկապարտեզի տնօրեն Գոհար Գալստյանը հերյուրանք որակեց այդ տեղեկությունը: «Մենք մանկապարտեզ ենք, մենք ուսումնական հաստատություն ենք, նման բաներով չենք զբաղվում: Մենք միջոցառման ենք պատրաստվում թումանյանական օրերի վերաբերյալ, ժամանակ չունենք` քաղաքականությամբ զբաղվենք»,- արագ-արագ ասաց Գալստյանը: Ի դեպ, նա չհերքեց, որ ՀՀԿ-ական է:
Կարդացեք նաև
Թիվ 31 մանկապարտեզի տնօրեն Մարինե Ամիրյանը եւս հերքեց լուրերը, թե Արտակ Սարգսյանի համար է աշխատում: «Նման բան չկա, եթե փաստեր կան, ներկայացրեք, խնդրեմ: Նման բան մեզ մոտ չկա: Ես ժամը տասից մինչև վեցը ներառյալ հիմնարկում եմ, թող մոտենա որևէ ծնող ու ասի, որ ես իրեն մոտեցել եմ նման հարցով»,-ասաց նա: Հարցին` Դուք Հանրապետակա՞ն եք, տիկինը մեծ գոհունակությամբ հայտարարեց. «Իհարկե, Հանրապետական եմ: Բայց մեզ մոտ նման բաներ չկան, եթե ունեք փաստեր, կանչեք, ես կմոտենամ համապատասխան վայր:
Թիվ 23 մանկապարտեզի տնօրեն Աստղիկ Հովիկյանի հետ էլ զրուցել չհաջողվեց, նա տեղում չէր, հեռախոսազանգին պատասխանող աշխատակիցն ասաց, թե Հովիկյանի հետ խոսելու համար «վերադասից» պետք է թույլտվություն ստանալ: Վերադասն էլ, պարզվում է, հենց ինքը` Հովիկյանն է:
Նշենք, որ այս ընտրատարածքում ՀՀԿ-ն առաջադրել է մի քանի թեկնածուների՝ ԱԺ նախագահ Գալուստ Սահակյանի որդուն՝ Արման Սահակյանին, ոստիկանապետ Վլադիմիր Գասպարյանի փեսային՝ Արթուր Գեւորգյանին, ԱԺ պատգամավոր Արա Բաբլոյանի որդուն՝ Արման Բաբլոյանին, նախկին թաղապետ Ալբերտ Երիցյանին եւ այլոց:
Նելլի ԳՐԻԳՈՐՅԱՆ
