Ադրբեջանի իշխանություններն ամեն ինչ անում են, որ թալիշները հրաժարվեն իրենց լեզվից, մշակույթից: Այս մասին այսօր մարդու իրավունքների պաշտպանի գրասենյակում «Այլատյացությունը և դրա հետևանքները մարդու իրավունքների տեսանկյունից» քննարկման ժամանակ ասաց թալիշական ազգային շարժման ակտիվիստ, Ադրբեջանից Հայաստան փախած Շահին Միրզոեւը:
«Ադրբեջանի իշխանությունները ստիպել են, որ բազմաթիվ թալիշներ հրաժարվեն թալիշերենից, նույնիսկ թալիշ անունը օրենքով արգելված է: Ինչ կազմակերպություն էլ լինի, եթե դրա անվան մեջ կա թալիշ բառը, ապա այն չի գրանցվում: Դասագրքերն արգելված են, հեռուստատեսությունն արգելված է: Տարրական բառարան ունենալու հարցում նույնպես արգելքներ կան: Վերջերս հրատարակված բառարանի հեղինակները ձերբակալվեցին, և արգելվեց այն տարածել»,- խոսելով թալիշների իրավունքների ոտնահարումից՝ պատմեց Շահին Միրզոեւը: Նա նաեւ ասաց, որ վերջին տարիներին թալիշաբնակ գյուղերը դատարկվում են հենց ադրբեջանական իշխանությունների գործողությունների պատճառով:
Անդրադառնալով հայ-ադրբեջանական շփման գծում իրավիճակի սրմանը՝ պարոն Միրզոեւը նկատեց, որ լարվածությունը սրելով՝ Ադրբեջանը փորձում է հասարակության ուշադրությունը շեղել ներքին խնդիրներից. «Բոլորը գիտեն, որ Ադրբեջանի նախագահ Իլհամ Ալիևը փոխնախագահ նշանակեց իր կնոջը, Ներքին գործերի նախարարն էլ իր որդուն նշանակեց տեղակալ: Այս նշանակումները հասարակության շրջանում լուրջ դժգոհության առիթ դարձան: Հետևաբար, Ալիևի ռեժիմը փորձում է իրավիճակը սահմանին սրել, որպեսզի հասարակության ուշադրությունը շեղի»:
Կարդացեք նաև
Արփինե ՍԻՄՈՆՅԱՆ
