Մեկ րոպեում՝ մեկ օրենք: ԱԺ-ն այս քառօրյայում ռեկորդ է խփել: Այս մասին ԱԺ ճեպազրույցների ժամանակ իր մտահոգությունը հայտնեց ՀԱԿ խմբակցության քարտուղար Արամ Մանուկյանը:
Նա ասաց, որ այդ որակն ապահովող ԱԺ-ի «կոճակները» հիմա փող են բաժանում, հեռախոսներ են բաժանում, անձնագրեր են վերցնում, ամեն ինչ անում են, որ նորից գան ԱԺ ու այս որակն ապահովեն. «Մենք սրա դեմը պիտի առնենք: Ունենք մի խորհրդարան, որտեղ րոպեն մեկ կարող է օրենք ընդունվել: Հարցրեք իրենց 90 տոկոսին, ոչ մեկը չի կարող ասել, թե ինչ է քվեարկվել, մարդկանց՝ հարյուր հազարների ճակատագիրը որոշող օրենքներ են ընդունում»:
Այս քառօրյայի ընթացքում 60 օրենք է ընդունվել: Արամ Մանուկյանի խոսքերով՝ սա լացելու բան է:
Կարդացեք նաև
Արամ Մանուկյանն անդրադարձավ նաեւ իր հեղինակած «Սահմանված կարգի խախտմամբ պարտադիր զինծառայություն չանցած քաղաքացիների մասին» օրենքում փոփոխությունների նախագծին: Նա ասաց, որ հարյուրավոր տղաներ պատրաստ են ՀՀ բյուջեին մուծել 4000 դոլարի չափ դրամ, դուրս գալ հետախուզումից եւ գալ Հայաստան: Արամ Մանուկյանը հարյուրավոր նամակներ է ստացել: Կան մարդիկ, որ դրսում դոկտորական են պաշտպանել, բայց խանգարել է հետախուզումը, ուզում են հարցերը լուծել. «Ոչ թե սա կապված է բանակից խուսափելու հետ, իհարկե, դա կա, բայց կա դեմոգրաֆիկ խնդիր, հազարավոր տղամարդիկ ուզում են գալ Հայաստան»:
Նա ասաց, որ եթե որոշեն, որ բանակից խուսափողն իրավունք չունի գալ Հայաստան, դա տարբերակ է, բայց այդ որոշումը պետք է կայացնի խորհրդարանը, ոչ թե Վիգեն Սարգսյանը:
Հռիփսիմե ՋԵԲԵՋՅԱՆ