The Guardian բրիտանական թերթի անցկացրած հետաքննության համաձայն՝ բրիտանական մի քանի խոշորագույն բանկեր ներգրավված են եղել փողերի լվացման միջազգային սխեմայի մեջ, որոնք դուրս են բերվել Ռուսաստանից: Պարբերականի տվյալներով՝ բրիտանական բանկերով անցել է ավելի քան 700 միլիոն դոլար, որի կեսից ավելին՝ HSBC բանկով:
Հոդվածում խոսքն այսպես կոչված «Լանդրոմատ» օպերացիայի մասին է, որը հայտնի դարձավ դեռևս 2014թ. ռուսական «Նովայա գազետա» թերթի և Organised Crime and Corruption Reporting Project (OCCRP) հետաքննող լրագրողների միջազգային կազմակերպության հետաքննությունից հետո:
Համարվում է, որ այս սխեմայի շրջանակներում 2011-2014թթ. Ռուսաստանից դուրս է բերվել 22 միլիարդ դոլար՝ դատավճիռների հիման վրա, որոնք կայացրել են մոլդովական դատարանները: Փողերը դուրս են բերվել Մոլդովա, ապա Լատվիա, որից հետո ԵՄ երկրներ, այդ թվում՝ Մեծ Բրիտանիա:
