Մարտի 29-ին «Առավոտ» օրաթերթում զետեղված «Անդրիաս Ղուկասյանը քարոզչություն իրականացնելու իրավունքից զրկված է» հրապարակման կապակցությամբ պարզաբանում ենք, որ համաձայն ՀՀ ընտրական օրենսգրքի 19-րդ հոդվածի 9-րդ մասի` «Ձերբակալված կամ կալանքի տակ գտնվող թեկնածուները և ընտրություններին մասնակցող կուսակցության ընտրական ցուցակում ընդգրկված թեկնածուները նախընտրական քարոզչությունն իրականացնում են ընտրական գործընթացներում վստահված անձանց միջոցով»:
Այդ նպատակով ձերբակալված կամ կալանքի տակ գտնվող թեկնածուներն իրավունք ունեն նախընտրական քարոզչության ընթացքում օրական մինչև 2 ժամ տևողությամբ համապատասխանաբար ձերբակալվածներին կամ կալանավորվածներին պահելու վայրերում հանդիպումներ ունենալու մինչև 3 վստահված անձանց հետ:
Ըստ այդմ, տեղեկացնում ենք, որ մարտի 1-ից առ այսօր կալանավորված անձ Ա. Ղուկասյանը 14 անգամ հանդիպել է իր 3 վստահված անձանց հետ` վերը նշված ձևաչափով:
ՀՀ արդարադատության նախարարության քրեակատարողական
վարչության հանրային կապերի բաժնի պետ Գոռ Ղլեչյան
