«Ելք» դաշինքի անդամներն այսօր Գորիսի, Սիսիանի և Եղեգնաձորի բնակիչներին էին հավաստիացնում, որ ստեղծված իրավիճակից ելք կա: «Ելք»-ի համամասնական ցուցակի երրորդ հորիզոնականը զբաղեցնող Նիկոլ Փաշինյանը բոլոր համայնքներում նույն կերպ էր սկսում իր հանդիպումները. «Եկել ենք ձեզ ասելու, որ Հայաստանը համակած հուսահատության ճգնաժամի, հուսահատության փոսից ելք կա»: Գորիսում «Ելքի» անդամներին ողջունեցին նաև զինվորները:
«Ելքի» համամասնական ցուցակի 2-րդ և 3-րդ հորիզոնականներում ընդգրկված Արամ Սարգսյանն ու Նիկոլ Փաշինյանը մի պահ բանավեճի մեջ մտան գորիսեցիների հետ: Երբ քննադատություններ էին հնչում երկրում գոյություն ունեցող վիճակից, իշխանությունների հասցեին, մի գորիսեցի կին հայտարարեց` բա հո հայը հայի դեմ դուրս չի՞ գա, ուստի եթե դուրս չեն գալիս իրար դեմ, ուրեմն պիտի միանան:
Արամ Սարգսյանն էլ հեգնեց, թե ճիշտ է հայ է, թալանում է երկիրը. «Նրանք վեց-յոթ ընտանիքով ավելի շատ հարստություն ունեն, քան ամբողջ ժողովուրդը»: Գորիսեցիներից մեկն էլ ռեպլիկի կարգով նետեց. «Անունը Սերժ ա, ազգանունը Ծառուկյան»:
Նիկոլ Փաշինյանն էլ փոքր-ինչ նեղսրտած ասաց. «Փոխանակ մտածեք` ինչ անենք, որ հարցը լուծվի, բոլորն իրար համոզում են, թե չի լինի: Դե ուրեմն այդպես էլ ապրեք: Ժողովուրդ, եթե մեզ պիտի լավություն անեք` մեզ ընտրելով, մեզ մի ընտրեք»:
Կարդացեք նաև
Գորիսեցիների մեկ այլ խմբի հետ զրույց ծավալվեց հասարակության մտածողության փոփոխության անհրաժեշտության մասին: Արամ Սարգսյանը վստահեցրեց ընտրողներին, թե եվրոպական մոդելի պետություն են ստեղծելու մեր ազգային ավանդույթների հիման վրա ու մանրամասնեց. «Եվրոպական կրթական համակարգ, եվրոպական առողջապահական համակարգ ենք ստեղծելու»:
Գորիսեցիները հետաքրքրվեցին` առաջարկում եք դո՞ւրս գալ Եվրասիական միությունից, պարոն Սարգսյանը պատասխանեց. «Մենք նախ ասոցացման համաձայնագիրն ենք գնում ստորագրելու, քանի որ համարում ենք, որ այնտեղ 500 միլիոնանոց շուկա է, իսկ Եվրասիական շուկան ավելի փոքր է. այնտեղ համ մենք, համ ռուսները, համ բելառուսները, համ ղազախները տուժում են: Մեզ այդ շուկայի մեկ տոկոսն են տալիս, որը մենք չենք աշխատել: Դրա համար էլ, երբ եվրասիական շուկա չէինք մտել, մեր ու ռուսների առևտրային բալանսն ավելի մեծ էր, քան այսօր»:
Գորիսեցի մի պապիկ բանավեճի ընթացքում հորդորեց. «Ժողովրդի ուղեղը փոխեք»: Նիկոլ Փաշինյանն արձագանքեց. «Բա դրա համար ենք փողոցներն ընկած: Ուղեղը կա, ուղղակի քնած է, պետք է արթնացնենք»:
Տաթև ՀԱՐՈՒԹՅՈՒՆՅԱՆ
