«Տեսակետ» մամուլի ակումբում հունիսի 1-ին կայացած ասուլիսի հյուրերն էին ՀՀ վաստակավոր արտիստ Սարգիս Նաջարյանը և Լուսինե Զաքարյանի կենսագիր Սերգեյ Մանվելյանը: Հունիսի 1-ին սիրված երգչուհի Լուսինե Զաքարյանը կդառնար 80 տարեկան: Բանախոսներն անդրադարձան նրա կյանքին ու գործունեությանը` նորովի գնահատելով նրա վաստակը: Քննարկվեց Լուսինե Զաքարյանի տուն-թանգարան ստեղծելու հարցը, ինչպես նաև ցուցադրվեցին նրա անձնական իրերից որոշ մասունքներ:
«Լուսինեն ինչպես ծնվել էր, այդպես էլ անմահացավ, մաքրամաքուր երեխայի նման…Առաջին անգամ Լուսինեի հետ հեռակա ծանոթացել եմ Էջմիածնում պատարագ լսելիս, իսկ դեմ առ դեմ ծանոթությունս կայացել է ռադիոյում: Այն ժամանակ վախեցած մտածում էի` արժի՞, որ ես` հողեղենս, մոտենամ այդ հրեշտակին»,- ասաց Սարգիս Նաջարյանը:
Նա նշում է, որ Լուսինե Զաքարյանը չէր սիրում համերգներից հետո մնալ՝ ծաղիկներ ստանալ, սրա-նրա տուն գնալ, համերգի ավարտից հետո միանգամից տուն էր գնում: «Մի անգամ էլ մտա զարդասենյակ, տեսա, որ այնտեղ նա մոռացել է իր գոտին, որը ես գողացա եւ հիմա թանկ մասունքի պես պահում եմ, եթե թանգարան ստեղծվի, կնվիրեմ թանգարանին»,-ասում է Սարգիս Նաջարյանը, որը նաեւ բաժակ ու ափսե ունի տաղանդաշատ երգչուհուց:
«Լուսինեի անվանն առաջին անգամ առնչվեցի հինգ տարի առաջ»,-ասում է Սերգեյ Մանվելյանը, հավելելով, որ Լուսինեին մոտեցել է որպես արվեստի սիրահար:
«Երբ 1990 թ. Գերմանիա են հրավիրում, խնդրում են տաճարում պատշգամբներից մեկից երգի…Լուսինեն այնքան վեհ եւ հոգեթով է երգում, որ զբոսաշրջիկները ապշում են»,-ասում է Մանվելյանը:
Նա հավելեց, որ դաշնակահար Էլեոնորա Գասպարյանի հավաստմամբ, Լուսինե Զաքարյանը նաեւ ջազ է երգել` զինվորների համար:
Բանախոսները ափսոսանք հայտնեցին, որ Լուսինե Զաքարյանը դեռեւս թանգարան չունի: «Ես շատ ցավում եմ, որ մշակույթի նախարարության եւ Լուսինե Զաքարյանի հետ հանդես եկած արվեստագետների կողմից անտարբերություն կա»,- ասաց Սերգեյ Մանվելյանը:
Վերջինս հայտնեց, որ առաջիկայում ընթերցողի սեղանին կդրվի նաեւ Մեդեա Աբրահամյանի մասին գիրքը:
Գոհար ՀԱԿՈԲՅԱՆ
