«Երկիր Ծիրանի» խմբակցությունն այսօր բոյկոտեց Երեւանի ավագանու նիստը: Այս խմբակցությունը, ինչպես ասաց «Երկիր Ծիրանիի» ղեկավար Զարուհի Փոստանջյանը, Երեւանի քաղաքապետարանի շենքի դիմաց ավագանու զուգահեռ նիստ անցկացրեց: «Երկիր Ծիրանին» այս նիստին ներկայացել էր փուչիկներով, որոնց վրա գրված էր՝ ՀՀԿ:
Փոստանջյանը ներկայացրեց այս խմբակցության մասնակցության բանաձեւն ավագանու նիստերին: Ըստ այդմ, «Երկիր Ծիրանին» օգտվելով իր լիազորություններից կազմակերպելու է մարդկանց եւ կազմակերպությունների ներգրավվածությունը խորհրդատվական գործընթացներին, հանրաքվեների հարուցմանը, պահանջագրերի եւ միջնորդագրերի ներկայացմանը, տեղական իշխանությունների պաշտոնական փաստաթղթերի ձեռքբերմանը, քննարկելու է եւ արձագանքելու է տեղական իշխանությունների եւ տեղական հանրային ծառայությունների վերաբերյալ ստացված բողոքները եւ առաջարկությունները, դիմելու է վարչական դատարան՝ ավագանու եւ քաղաքապետի ակտերի իրավաչափությունը վիճարկելու հարցերով, ներկայացնելու է հաղորդում հանցագործության վերաբերյալ իրավապահ մարմինների ավագանու եւ քաղաքապետի ակտերի անօրինականության վերաբերյալ:
Մանրամասն՝ տեսանյութում
Զարուհի Փոստանջյանի խոսքերով՝ «Մեր լիազորությունների մեջ է մտնում ունենալ հանդիպումներ Երեւանի բոլոր վարչական շրջաններում: Մենք ոչ միայն հանդիպումներ ենք ունենալու քաղաքացիների հետ, այլեւ նրանց միջոցով պատրաստելու ենք բոլոր այն հարցերի քննարկումն ու դրանց լուծում տալու հնարավորությունը: Սա կամավոր աշխատանք է եւ վարձատրվող չէ: Այդ նիստերն առանց այն էլ տեղի են ունենալու, մենք ունենալու ենք 12 նիստ բոլոր վարչական շրջաններում: 4 հանձնաժողովներում ներգրավված են լինելու մեր ավագանու անդամները»:
Փոստանջյանը խոստացավ, որ վերահսկելու են Երեւան քաղաքի բյուջեն.«Պետք է բռնենք այս կրիմինալ իշխանության ձեռքը եւ պետք է հասնենք նրանց պատասխանատվության կանչելուն եւ նրանց նկատմամբ արդարացի պատիժ կիրառելուն: Դուք բոլորդ գիտեք, որ Երեւանի բյուջեն չարաշահումների միջոցով յուրացվում է, նաեւ բազմաթիվ պաշտոնյաներ այս բյուջեի հիմքի վրա հարստանում են»:
Մինչ Փոստանջյանը ներկայացնում էր իրենց բանաձեւը, քաղաքապետարանում ավագանու նիստն էր ընթանում, որի օրակարգի նախագծերը հանրությանը չէր վերաբերում.«Այդ օրակարգը հետաքրքրում է հանցագործ իշխանությանը՝ ՀՀԿ-ին, այդ օրակարգը երեւանցիներինը չէ, այլ՝ ՀՀԿ-ինը: Այդտեղ նշված են Երեւանի քաղաքապետի երդման արարողության հետ կապված կազմակերպչական հարցեր: Անհասկանալի է՝ ինչ կազմակերպչական հարցեր են, հավանաբար, նորից մեր հանրային գումարների մասին է խոսքը, թե որքան գումար պետք է ծախսվի, եւ այս հանցագործ իշխանությունները որքան գումար պետք է ծախսեն իբրեւ թե երդման արարողությանը»:
Նելլի ԲԱԲԱՅԱՆ
