Հաղարջենու պտուղներն օժտված են տոնուսավորող, անոթալայնիչ, հիպոգլիկեմիկ (իջեցնում են շաքարի պարունակությունը արյան մեջ), միզամուղ, քրտնաբեր, հակաուռուցքային, հակաօքսիդանտ հատկություններով։ Տերեւները միզամուղ են եւ քրտնաբեր, խթանում են մակերիկամների կեղեւի ֆունկցիան։ Պտուղները կիրառվում են որպես վիտամինային միջոց հիպո եւ ավիտամինոզների ժամանակ, նաեւ որպես հակաթունային միջոց՝ օրգանիզմից հեռացնում են ծանր մետաղները, խոլեստերինը։ Հաղարջենին մեծացնում է դիուրեզը, լավացնում է քունը, իջեցնում արյան ճնշումը։ Պտուղներն ու տերեւները կիրառվում են ստամոքսի եւ 12 մատնյա աղու խոցային հիվանդության, ինչպես նաեւ տարաբնույթ դերմատիտների եւ ցաների ժամանակ։
Դեղատոմսեր եւ պատրաստուկներ
Ավիտամինոզ
5 ճաշի գդալ չորացրած՝ անկրացրած տերեւներին ավելացնել 1 լիտր եռման ջուր, թրմել թերմոսում 1 ժամ։ Ընդունել 4-5 բաժակ՝ օրվա ընթացքում։
Միզաքարային հիվանդություն
1 ճաշի գդալ տերեւներին ավելացնել 1 բաժակ եռման ջուր, թրմել 30 րոպե, քամել։ Ընդունել 0,5 բաժակ՝ օրը 4-5 անգամ։
Հազ, վերին շնչուղիների բորբոքային հիվանդություններ
Հաղարջի մեկ բաժակ թարմ հյութը թեթեւակի գոլացնել, ավելացնել 2 ճաշի գդալ մեղր։ Ընդունել 0,5 բաժակ՝ օրը 3 անգամ։
Պատրաստեց Անուշ ՄԱԹԵՎՈՍՅԱՆԸ
«Առավոտ» օրաթերթ
02.08.2017
