Երեկ երեկոյան ժամը 21․00-ի սահմաններում Գյումրու բժշկական կենտրոն է տեղափոխվել անչափահաս, 17-ամյա մի տղա՝ դեմքի, զույգ վերին վերջույթների, որովայնի, ազդրերի 2-րդ, 3-րդ աստիճանի թերմիկ այրվածքով, մարմնի մակերեսի մոտ 20-25 տոկոսի չափով, այրվածքային շոկով:
Նրան առաջին բուժօգնություն ցուցաբերելուց, հակաշոկային դեղամիջոցներ ներարկելուց հետո շտապբուժօգնության բժշկական խմբով ուղարկել են մասնագիտացված կլինիկա՝ Երևանում գտնվող «Ճառագայթային բժշկության և այրվածքների հանրապետական գիտական կենտրոն»։ Այս մասին Aravot.am-ին տեղեկացրեց Գյումրու բժշկական կենտրոնի փոխտնօրեն Արմեն Խաչատրյանը։
Շիրակի մարզի դատախազ Կարեն Գաբրիելյանից էլ տեղեկացանք, որ նյութեր են նախապատրաստվում, նյութերում առկա փաստական տվյալները վկայում են այն մասին, որ կատարվածն անզգուշություն է։
Ըստ մամուլի հրապարակումների, ընկերը, կատակելով բենզին է լցրել տղայի վրա, որից հետո, իբրև կատակում է, կրակայրիչը վառել է։ Տղան փորձել է ընկերոջ ձեռքից վերցնել կրակայրիչը, սակայն կրակ է բռնկվել, ինչի հետևանքով նա այրվածքներ է ստացել:
Նունե ԱՐԵՎՇԱՏՅԱՆ
