Ինչպես տեղեկացրել ենք, այսօր ԱԺ տարածքային կառավարման, տեղական ինքնակառավարման, գյուղատնտեսության եւ բնապահպանական հարցերի հանձնաժողովում քննարկվեց կառավարության նոր նախագիծը, ըստ որի Հայաստանում վաճառվող միսն անպայման պետք է ունենա սպանդանոցի տեղեկանք, այսինքն, կենդանին, որն իրացվում է, պետք է անպայման մորթի ենթարկված լինի սպանդանոցներում:
«Ծառուկյան» դաշինքի պատգամավոր Վարդան Ղուկասյանը Սննդամթերքի անվտանգության պետական ծառայության պետ Իշխան Կարապետյանին հարցրեց՝ պետությունը չի՞ կարող կարգավորել սպանդանոցային ծառայությունների գները: Աշոցքում կարող է մի սպանդանոց լինի ու գին թելադրի մարդկանց. «Այստեղ պետությունը պետք է լուրջ դերակատարություն ունենա, ոնց որ մոնոպոլիզացնենք, թողնենք էդ մեկի հույսին»:
Իշխան Կարապետյանը վստահեցրեց, որ ՀՀ տարածքում 30-70 սպանդանոց է գործելու, հետեւաբար մրցակցային դաշտ է ապահովվելու:
Ուշագրավ էր, որ իր խոսքում Վարդան Ղուկասյանը հայտարարեց. «Գոնե սկզբնական շրջանում յուրաքանչյուր քաղաքում գոնե մի երկու հատ սպանդանոց լիներ: Վերավաճառողները ավելի շատ գումար են ստանում, քան գյուղացին, որն էդ անասունը երկար տարիներ պահում է: Ես էլ ֆերմեր եմ, դրանից լավ տեղյակ եմ»:
Վարդան Ղուկասյանն իր խոսքում մի քանի անգամ շեշտեց, որ ինքը ֆերմեր է:
Հռիփսիմե ՋԵԲԵՋՅԱՆ
