«Մեզ չափազանց հայրենասիրության մեջ մեղադրեք, ոչ թե՝ մեղադրական եզրակացություններ եք բերել-շարել»,-2016թ. Ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռեր» խմբի անդամների գործով դատական նիստում այսօր հայտարարեց ամբաստանյալներից Արամ Հակոբյանը:
Դատաքննությունը մեղադրական եզրակացությունների առնչությամբ դիրքորոշումներ արտահայտելու փուլում է:
Արամ Հակոբյանը, դիմելով դատավոր Արթուր Օհանյանին, ասաց. «Երեսուն տարում ես չտեսա մի նշույլ առ այն, որ այս երկրում ինչ-որ բան կարող է փոխվել: Մենք ոչ թե պետության դեմ ենք դուրս եկել, այլ պետություն ունենալու խնդիր ենք դրել: Իշխանությունը եւ պետությունը մի խառնեք իրար, որովհետեւ իշխանությունը բռնազավթել է պետությունը»:
Ապա Արամ Հակոբյանը համոզմունք հայտնեց, որ դատավորը կաշկանդված է իր գործողություններում. «Դուք շղթայված-նստած եք այստեղ…դուք ավելի շատ «կալանավոր» եք, քան մենք: Մարմինը կարող եք բանտարկել, բայց միտքն ու հոգին՝ երբեք»:
Արամ Հակոբյանը վստահ է, որ այս գործով դատախազների եւ քննիչների «ձեռքն ու ոտքը կապված են»: Արամ Հակոբյանը, ինչպես եւ մյուս ամբաստանյալները, հայտարարեցին, որ մեղադրանքը չեն ընդունում:
Լուիզա ՍՈՒՔԻԱՍՅԱՆ
