Այս հանգստյան օրերին Հայաստան ներթափանցող քամիները այնքան ուժեղ են լինելու, որ հնարավոր է կոտրվեն ծառեր կամ ծառի ճյուղեր, պոկվեն տանիքներ, ընկնեն գովազդային վահանակներ եւ էլեկտրահաղորդման գծեր:
Այս մասին «Անդրադարձ» ակումբում ասաց «Հիդրոմետ» ծառայության օդերեւութաբանության կենտրոնի պետ Գագիկ Սուրենյանը։
«Շիրակում, Լոռիում, Տավուշում, Գեղարքունիքում, Սյունիքում եւ Արցախում քամու պոռթկումները կարող են հասնել 30-35մ/վայրկյան արագության, Կոտայքում, Արմավիրում, Արագածոտնում, Արարատում, Վայոց ձորում, Երեւանում քամու պոռթկումները կարող են հասնել 20-25մ/վայրկյան արագության»,-ասաց Սուրենյանը:
Ըստ Սուրենյանի, Հայաստան ներթափանցող տաք օդային հոսանքները բախվում են Սեւ ծովի վրա առկա ցուրտ օդային հոսանքների հետ. «Կլինի քամի, բայց կզգանք գոլ, սառը օդ։ Այս երեւույթի արդյունքում մարտի 24-ին կեսօրից մինչեւ մարտի 25-ի կեսօրը հանրապետության տարածքում սպասվում են վտանգավոր ուժգնության քամիներ»։
Վաղը Երեւանում սպասվում է մինչեւ 26-28 աստիճան օդի ջերմություն, իսկ Սյունիքում մինչեւ 30 աստիճան եւ ավելի ջերմություն:
Մանրամասն՝ տեսանյութում
Ըստ Սուրենյանի՝ վերջին անգամ քամու նման պոռթկումներ եղել են 2015 թվականին, Վանաձորում այդ տարի քամու ուժգնությունը հասել է մինչեւ 40մ/վայրկյան:
Նելլի ԲԱԲԱՅԱՆ
