«ԵՊՀ Ռեստարտ» նախաձեռնությունը, արձագանքելով ԵՊՀ պրոռեկտորներ Գեղամ Գևորգյանի և Ալեքսանդր Գրիգորյանի կողմից սույն թվականի մայիսի 30-ին արված հայտարարությանը և նրանց կողմից նախաձեռնած ու ընթացքի մեջ գտնվող ստորագրահավաքին, արձանագրում է.
1. Հաշվի առնելով սույն թվականի մայիսի 29-ի լույս 30-ի գիշերը ԵՊՀ ռեկտոր Արամ Սիմոնյանի առողջական վիճակի վատթարացումը նույն օրը «ԵՊՀ Ռեստարտ»-ը հանդես եկավ հայտարարությամբ, որում ասվում է այն մասին, որ նախաձեռնությունը դադարեցնում է դասադուլը, սակայն չի հրաժարվում նախորդ օրերին առաջ քաշված պահանջներից: Պնդումներն այն մասին որ ԵՊՀ ուսանողները «գրավել» են ԵՊՀ տարածքը առնվազն տարօրինակ է, քանի որ ԵՊՀ տարածքը ուսանողներինն է նույնքան, եթե ոչ ավելի շատ, քան ԵՊՀ վարչական աշխատակիցներինը:
2. Հայտարարությունում առկա մյուս կետերը, որտեղ ուսանողները մեղադրվում են օրինախախտումների մեջ նույնպես անհասկանալի են, հաշվի առնելով նաև այն փաստը, որ ակցիայի ողջ ընթացքը ուղիղ հեռարձակվում էր մի շարք ԶԼՄ-ների կողմից և որևէ անօրինական գործողություն չի արձանագրվում: Հարկ է նշել նաև, որ իրավախախտում արձանագրելու պարագայում, ոչ թե հրապարակվում է հայտարարություն և փորձ է արվում օգտագործելով ադմինիստրատիվ լծակները ստիպել ԵՊՀ աշխատակիցներին և ուսանողներին միանալ դրան, այլ կատարվածի մասին հաղորդվում է իրավապահ մարմիններին: Այս գործողությունները վկայում են այն մասին, որ ԵՊՀ ղեկավարությունը ոչ մի կերպ չի կարողանում գիտակցել երկրում տեղի ունեցած փոփոխությունների էությունը և շարունակում է դիտարկել ԵՊՀ-ն որպես սեփական «օբյեկտ»:
3. Անդրադառնալով հայտարարության այն կետին, որում նշվում է այն մասին, որ ԿԳ նախարարությունը անտարբեր է Մայր բուհում տիրող իրավիճակին, պետք է փաստենք, որ հենց ամսի 29-ին ԿԳ նախարար Արայիկ Հարությունյանը այցելել է ուսանողներին, հետաքրքրվել համալսարանում տիրող իրավիճակից, սակայն ԵՊՀ ղեկավարության հետ հանդիպում չի ունեցել, քանի որ նրանցից ոչ ոք տեղում չէր: Դրա հետ մեկտեղ անհասկանալի են իրարամերժ կոչերը ԿԳՆ-ին և Կառավարությանը մի կողմից «անտարբեր չմնալ» մյուս կողմից «չմիջամտել» ԵՊՀ-ում տիրող իրադարձություններին:
4. Ցանկանում ենք տեղեկացնել նաև, որ ԵՊՀ Ռեստարտ նախաձեռնությունը ուսանողության շրջանում շարունակում է ակտիվ քննարկումները Նոր Հայաստանում Նոր Համալսարան ունենալու համար անհրաժեշտ գործողությունների և ծրագրերի մասին և մոտ ապագայում կներկայացնի դրանցից մի քանիսը:
