Լրահոս
Օրվա լրահոսը

Լուսինե Մարտիրոսյան. «Երջանիկ եմ, որ հայ ազգի համար Սիմոնի նման որդի եմ մեծացրել»

Նոյեմբեր 12,2018 16:45

«Զվարթնոց» օդանավակայանում ծանրամարտի Հայաստանի ազգային հավաքականին դիմավորելու էր եկել նաեւ աշխարհի չեմպիոն Սիմոն Մարտիրոսյանի մայրը՝ Լուսինե Մարտիրոսյանը: Aravot.am-ը նրանից տեղեկացավ, թե ինչ զգացումներ ունի աշխարհի չեմպիոնի մայրը:

-Տիկին Լուսինե, շնորհավորում ենք ձեր որդու փառահեղ հաղթանակի առիթով:

-Շնորհակալություն: Սիմոնի հատկապես այս հաղթանակը, վստահ եմ, շատ ուրախացրեց մեր ժողովրդին: Ուրախ եմ, որ հայ ժողովրդի համար կարողացել եմ այդպիսի զավակ մեծացնել: Շնորհակալ եմ պարոն Ծառուկյանին իր կատարած աշխատանքի համար, Սիմոնի անձնական մարզիչ Աշոտ Փիլոսյանին, որ շատ մեծ դեր է կատարել տղայիս կայացման գործում, Փաշիկ Ալավերդյանին, Վիգեն Խաչատրյանին, բոլոր նրանց, ովքեր միշտ ու ամեն հարցում տղայիս հետ են:

-Ասում են, որ Սիմոնի մրցելույթներին չեք հետեւում:

-Ճիշտ են ասում: Բայց Աստված եմ կանչում, որ անվնաս մասնակցի ու ծանրաձողը բարձրացնի: Աստված միշտ նրա հետ է:

-Երբ մեկնում էր Աշգաբադ, ի՞նչ ասացիք նրան:

-Առաջինն առողջություն եմ մաղթել, անփորձանք մասնակցություն ու վերադարձ: Ասացի հավատում եմ՝ կապացուցի աշխարհին, որ կա մի ազգ, որն ունի այսպիսի ուժեղ զավակներ:

-Որպես աշխարհի արդեն լիարժեք չեմպիոնի մայր, ի՞նչ զգացումներ ունեք:

-Երջանիկ եմ ու ցանկանում եմ, որպեսզի բոլոր մարզիկների մայրերը նույնպես այսպիսի երջանկություն ապրեն:

-Ձեր մյուս զավակն էլ արդեն ճանաչված ծանրորդ է:

-Արսենս եղբորից ոչնչով պակաս չէ: Մարզիչները նրանից էլ սպասելիքներ ունեն: Նրա մոտ էլ ամեն բան լավ կլինի: Երկու եղբայր պիտի ապացուցեն, որ կարող ուժ են հայ ազգի համար:

-Եթե մի օր Սիմոնն ու Արսենը նույն քաշային կարգում իրար հետ մրցեն, ո՞ւմ ավելի շատ կերկրպագեք:

-Երկուսին էլ: Տարբերություն չկա. թող մեկն առաջինը լինի, մյուսը՝ երկրորդը: Ափսոս, որ ծանրամարտում երկու առաջին տեղ չկա:

-Չնայած ձեր տղաների ելույթներին չեք հետեւում, բայց հավանաբար ծանրամարտի կանոններից գլուխ հանում եք: Աշգաբադում Սիմոնի երրորդ մոտեցումը պոկում վարժությունում մրցավարները չգրանցեցին: Ճի՞շտ վարվեցին:

-Ոչ: Սիմոնը քաշը բարձրացրել էր: Մրցավարները սխալ վարվեցին:

Աշոտ ՀԱԿՈԲՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Նոյեմբեր 2018
Երկ Երե Չոր Հնգ Ուրբ Շաբ Կիր
« Հոկ   Դեկ »
 1234
567891011
12131415161718
19202122232425
2627282930