Կիրակի Հայաստանում տեղի ունեցած արտահերթ խորհրդարանական ընտրությունները ցույց տվեցին վարչապետի պաշտոնակատարի «Իմ քայլը» դաշինքի մեծ հաղթանակը: Այս մասին ասվում է Եվրախորհրդարանի՝ Հարավային Կովկասի հետ հարաբերությունների պատվիրակության ղեկավար Սաջադ Քարիմի հայտարարության մեջ:
«Հայաստանի Ազգային ժողովում ստեղծված նոր քաղաքական լանդշաֆտը լրացուցիչ պատասխանատվություն է բերում կառավարությանը՝ իրականացնելու իր բարեփոխումների ծրագիրը ընտրական շրջանակում և կոռուպցիայի դեմ պայքարում»,- ասվում է հայտարարության մեջ:
Քարիմը նաև մեջբերել է միջազգային դիտորդների գնահատականն այն մասին, որ ընտրություններն, ընդհանուր առմամբ լավ կազմակերպված էին՝ չնայած կարճ ժամանակահատվածին: Ընտրախախտումների և չարաշահումների (ինչպիսիք են ձայների գնումը և ընտրողների վրա ճնշումները) ընդհանուր բացակայությունը թույլ է տվել իրական մրցակցություն: Որպես արդյունք՝ գործընթացի նկատմամբ հանրային վստահությունը եղել է շատ բարձր:
«Մեր պատվիրակությունը հատուկ շնորհակալություն է հայտնում Ընտրությունների դիտորդական առաքելությանը այս կարևոր առիթով տեղում իրենց կատարած աշխատանքի համար»,- ասվում է հայտարարության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
