«Իմ քայլը» դաշինքի ավագանու անդամ Իզաբելլա Աբգարյանը Aravot.am-ին որոշ մանրամասներ պատմեց երեկ ուշ երեկոյան վարչապետի պաշտոնակատար Նիկոլ Փաշինյանի ու ավագանու անդամների հանդիպումից:
«Վաղուց պլանավորված հանդիպում էր, նա ցանկություն ուներ ավագանու հետ հանդիպել, զրուցել ընթացիկ հարցերի մասին, հասկանալ՝ ինչպես ենք աշխատել, ինչ ծրագրեր ունենք»,- ասաց Իզաբելլա Աբգարյանը: Մեր հարցին՝ Նիկոլ Փաշինյանն ինչ դիտողություններ արեց, Իզաբելլա Աբգարյանը պատասխանեց՝ ոչ մի դիտողություն չի արվել. «Դիտողություններ չկային, վարչապետն ավելի շատ լսում էր, քան՝ խոսում: Նա ուզում էր՝ մեզնից՝ յուրաքանչյուրից, իմանալ՝ արդյոք ինչ լծակների պակաս ունենք»:
Վարչապետի պաշտոնակատարը ավագանու անդամներին նաեւ հիշեցրել է իրենց քաղաքական գիծը, որով պետք է աշխատի ավագանին. «Նա մեզ հիշեցրեց, որ չմոռանանք մեր նախընտրական ծրագիրը, հորդորեց, որ հավատարիմ մնանք մեր տեսակին, մեր հռչակած սկզբունքներին»:
Միակ խնդիրը, որ ավագանու անդամները բարձրացրել են հանդիպման ժամանակ, ըստ մեր զրուցակցի, եղել է գործող ավագանու կանոնակարգի մասին. «Գործող ավագանու կանոնակարգն ու ՏԻՄ օրենքը ավագանու մասին լիարժեք չեն արտացոլում այն աշխատանքը, որ կուզենայինք անել, ավագանին զրկված է մի շարք լիազորություններից»:
Կարմիր գծերի, աղբահանության ու հանրությանը հուզող այլ հարցերի մասին վարչապետի պաշտոնակատարը չի խոսել հանդիպման ընթացքում, ըստ Իզաբելլա Աբգարյանի հանդիպումը կարճ էր, առանձին հարցերի անդրադարձ չի եղել:
Արփինե ՍԻՄՈՆՅԱՆ
