Այսօր մամուլում եւ սոցցանցերում հրապարակումներ եղան այն մասին, որ հացադուլից հետո քրեակատարողական հիմնարկում մահացել է Haynews.am կայքի հիմնադիր-պատասխանատու, ազատամարտիկ Մհեր Եղիազարյանը, որը եղել է «Հայոց արծիվներ. միասնական Հայաստան» կուսակցության փոխնախագահը:
Հիշեցնենք, որ ըստ ԱԱԾ հաղորդագրության՝ նա ձերբակալվել էր դեկտեմբերի 4-ին: «Բացահայտվել է կաշառք տալու պատրվակով առանձնապես խոշոր չափերի խարդախության դեպք»,-ասվել էր ԱԱԾ հաղորդագրության մեջ:
Հաջորդ օրը Մհեր Եղիազարյանը հացադուլ էր հայտարարել՝ նշելով, որ չի վստահում նախաքննության ընթացքին:
«Տեղյակ չեմ եղել, որ նա տեւական ժամանակ գտնվել է հացադուլի մեջ: Առաջին դեպքն է կարծես, որ անձը երկարատեւ հացադուլի մեջ գտնվի: Նա տասը օր՝ դուրս էր եկել հացադուլից, այսինքն՝ հունվարի 17-ին: Աստված չանի՝ նման դեպքը նախադեպ դառնա»,-Aravot.am-ի հետ զրույցում անդրադառնալով Մհեր Եղիազարյանի մահվան փաստին՝ ասաց իրավապաշտպան, Արցախի մարդու իրավունքների նախկին պաշտպան Ռուբեն Մելիքյանը:
Նա կատարվածի շուրջ մի շարք հարցադրումներ առանձնացրեց, որոնք, իր բնորոշմամբ, հանրությունը պետք է ներկայացնի եւ ակնկալի արագ պատասխաններ:
«Քննչական մարմինները, կարծում եմ, նման ցավալի եւ ողբերգական հետեւանքից հետո չեն կարող նախաքննական գաղտնիքի վրա հղում անելով՝ չտալ տեղեկատվություն Մհեր Եղիազարյանի գործի մասին: Պետք է հասկանալ՝ այդ ի՞նչ գործ էր, որ անձի հանդեպ քրեական հետապնդում իրականացվեց, ի՞նչ հանգամանքներ հիմք հանդիսացան, որպեսզի նա կալանավորվի, եւ ինչո՞ւ գրավ չի կիրառվել նրա խափանման միջոց կալանքը փոխելու համար: Պետք է նաեւ հասկանալ՝ պատկան մարմիների կողմից իրավաչափ վարքագիծ եղե՞լ է, թե ոչ: Մյուս կողմից, ի՞նչ միջոցներ է ձեռնարկել ՔԿՀ-ն՝ անձի կյանքի իրավունքը երաշխավորելու համար. օրինակ՝ առողջության նկատմամբ հսկողությունը պատշա՞ճ է եղել, հասարակական վերահսկող իրականացնող կառույցները տեղեկացվե՞լ են այդ մասին, թե ոչ»,-ընդգծեց Ռուբեն Մելիքյանը:
Նա նշեց, որ դեռ ամբողջական տեղեկություններ չի կարողանում գտնել այն մասին, թե ինչ պահանջներով էր Մհեր Եղիազարյանը հացադուլ սկսել եւ ինչ հանգամանքներում էր դադարեցրել այն. «Սա կարեւոր է՝ հաշվի առնելով այն հանգամանքը, որ նա կարծես թե ընդդիմադիր հայացքներ ուներ եւ հանրային գործունեություն էր իրականացնում»:
Հաշվի առնելով այն փաստը, որ սոցցանցերում հանրային գործիչներն ահազանգում են Մհեր Եղիազարյանի հացադուլի հանդեպ իրավապաշտպան հանրության լռության մասին, հետաքրքրվեցինք՝ նման մեղադրանքները հիմնավո՞ր են: Ռուբեն Մելիքյանը պատասխանեց. «Պետք է հասկանալ՝ իրավապաշտպան հանրությունը տեղեկացված եղե՞լ է, թե ոչ: Սա այն դեպքն էր, որ չպետք է վրիպեր իրավապաշտպան հանրության ուշադրությունից, բայց, ցավոք, չենք կարող ասել, որ չի վրիպել»:
Լուիզա ՍՈՒՔԻԱՍՅԱՆ
