«Շատերը երեւի չգիտեն, թե Օրբելյանը որքան գումարներ է թատրոնի համար ներդրել անձնական միջոցներից, դրսից հրավիրել լավագույն մասնագետներին՝ կրկին իր միջոցներով: Նա նաեւ թատրոնին է նվիրել թանկարժեք տեխնիկա»,- Օպերայի եւ բալետի ազգային-ակադեմիական թատրոնում այսօր թատրոնի արտիստների եւ մշակույթի գործիչների հավաքի ժամանակ հայտարարեց Օպերայի եւ բալետի ազգային-ակադեմիական թատրոնի աշխատակազմի ղեկավար Արթուր Դալլաքյանը՝ ցանկանալով մատնանշել, թե որպես տնօրեն Կոնստանտին Օրբելյանն ինչպիսի ներդրում է ունեցել թատրոնի զարգացման համար:
Թատրոնի արտիստներն այսօր հավաքվել էին՝ սատարելու Օրբելյանին եւ բողոքելու նրան թատրոնի տնօրենի պաշտոնից ազատելու որոշման դեմ: Հիշեցնենք, որ Մշակույթի նախարարի պարտականությունները կատարող Նազենի Ղարիբյանի հրամանով՝ Օրբելյանն ազատվել է այդ պաշտոնից, քանի որ ըստ ՏԻՄ օրենքի՝ նա չի կարող միաժամանակ լինել թատրոնի տնօրեն ու գեղարվեստական ղեկավարը, իսկ «Լեզվի մասին» օրենքի համաձայն՝ նա պետք է տիրապետի հայերենին (Օրբելյանը ռուսերեն է հաղորդակցվում):
Թատրոնի ռեժիսոր Հարություն Արզումանյանն էլ շեշտեց՝ Նազենի Ղարիբյանը թատրոնի խաղացանկից տեղյակ չէ, մեներգիչներին չի ճանաչում. «Որեւէ բանից տեղյակ չէ, անգամ չգիտի, թե «Արտավազդ» մրցանակաբաշխությունն ինչ է»: Ըստ ռեժիսորի՝ Օրբելյանի շնորհիվ թատրոնում աշխատանքային մթնոլորտը բացառիկ մակարդակի է: Կոնստանտին Օրբելյանին աջակցություն հայտնեցին Հայաստանի թատերական գործիչների միության նախագահ Հակոբ Ղազանչյանը, Մարտիրոս Սարյանի տուն-թանգարանի տնօրեն Ռուզան Սարյանը, Կոմպոզիտորների միության նախագահ Արամ Սաթյանը, մշակույթի տասնյակ գործիչներ: Նրանք Նազենի Ղարիբյանի հրամանը «խայտառակություն» որակեցին: Ռուզան Սարյանն ընդգծեց. «Այդ որոշումը համաշխարհային երաժշտական հանրության առաջ ՀՀ-ին խայտառակ անող որոշում է»:
Հավաքի ավարտին ցանկացավ ելույթ ունենալ թատրոնի գեղարվեստական ղեկավար Կոնստանտին Օրբելյանը: Լեցուն դահլիճը նրան տեւական ժամանակ ծափահարեց. Օրբելյանը հուզմունքից լաց եղավ, ապա հայտարարեց. «Ես սիրում եմ Հայաստանը: Ես քաղաքական գործիչ չեմ: Ինձ միայն մեկ բան է հետաքրքրում՝ հայկական օպերայի եւ բալետի միակ թատրոնի զարգացումը: Շնորհակալ եմ այս թատրոնի բացառիկ անձնակազմին: Մեծ ծրագրեր ունեմ, եւ շատ տխուր կլիներ ընդհատել այն ճանապարհը, որը բռնել է մեր թատրոնը: Շատ կափսոսեմ»:
Կարդացեք նաև
Այլ մանրամասները՝ տեսանյութում
Ուղիղ։ Օպերայի արտիստները բողոքում են թատրոնի տնօրենի պաշտոնից Կոնստանտին Օրբելյանի ազատման դեմ
Gepostet von Aravot am Samstag, 30. März 2019
Լուիզա ՍՈՒՔԻԱՍՅԱՆ
“որքան գումարներ է թատրոնի համար ներդրել”…. Հաաա հիմա ամեն ինչ պարզ է: Ուղղակի չէի կարող հասկանալ թե ինչու են սենց պայքարում այս ռուսախոս մարդու համար: Բայց անհանստանալու բան չկա: Պարոն Օրբելյանը միակը չէ ով փող ունի: Ի դեպ կեցցե Հայաստանը որ վերջապես պաշտպանում է օրենքներն ու հատկապես լեզվի մասին օրենքը