Վարչապետ Փաշինյանը այսօր կառավարության նիստի օրակարգին անցնելուց առաջ ԱԱԾ ղեկավարին հանձնարարեց «պայքար» սկսել մամուլում ֆեյք լուրերի ու սոցցանցերում ֆեյքերի դեմ: Վարչապետը ԱԱԾ տնօրեն Արթուր Վանեցյանին հանձնարարեց քայլեր ձեռնարկել ապատեղեկատվության դեմ, որոնք տարածվում են սոցցանցերով եւ լրատվամիջոցներով:
Փաշինյանն ասաց. «Մենք դրա մասին մի քանի անգամ խոսակցություն ունեցել ենք: Այո, մեր երկրում խոսքի և տեղեկատվության ազատությունը երաշխավորված է: Բայց եթե որոշ հանցավոր շրջանակներ միլիոններ են ծախսելու սոցիալական ցանցերում, լրատվամիջոցներում, հասարակական կարծիքի մանիպուլյացիաներ անելու համար, դա ազգային անվտանգության խնդիր է»:
Վարչապետը հույս հայտնեց, որ ԱԱԾ-ն կկարողանա այս հարցում ապահովել կոնկրետ արդյունքներ. «Ընդհուպ սոցիալական ցանցերում կան, այսպես ասած, հեղափոխության դրոշներով հանդես եկող ֆեյքեր, որոնք բռնությունների կոչեր են անում, ընդհուպ նախկին իշխանությունների ներկայացուցիչների հասցեին՝ ցույց տալու, որ մեր հեղափոխական շրջանակների հետ կապ ունեն»: Այսպիսի մանիպուլյացիաները, ինչպես ասաց Փաշինյանը, պետք է շատ կոշտ հակահարված ստանան օրենքի շրջանակներում: Վարչապետն ասաց, որ նման գործողություններ օրենսդրությունը թույլ է տալիս՝ որևէ կերպ կասկածի տակ չդնելով ՀՀ-ում խոսքի ազատության իրավունքը:
Նելլի ԲԱԲԱՅԱՆ
