Ուկրաինայի գործող նախագահ Պյոտր Պորոշենկոն, ինչպես խոստացել էր, ապրիլի 14-ին ժամանել է Կիևի «Օլիմպիական» մարզադաշտ՝ մասնակցելու Վլադիմիր Զելենսկու հետ բանավեճի, որը նախօրեին հայտնել էր, որ հրաժարվում է մասնակցել միջոցառմանը, քանի որ ինքը բանավեճի համար այլ օր էր ընտրել:
Մասնավորպես, Զելենսկին առաջակել էր բանավեճ անցկացնել «Օլիմպիական» մարզադաշտում ուրբաթ օրը՝ ապրիլի 19-ին, ինչպես որ թույլատրում է օրենսդրությունը: Սակայն պետության ղեկավարը հայտարարել էր, որ այդ օրը բանավեճի կմասնակցի բացառապես միայն «UA. Առաջին» հեռուստաալիքի եթերում և իր հերթին Զելենսկուն առաջարկել էր մարզադաշտ ժամանել կիրակի՝ ապրիլի 14-ին:
Կիրակի ուղիղ ժամը երկուսին Պորոշենկոն ժամանակել է «Օլիմպիական» մարզարդաշտ, որտեղ հավաքվել էին նրա մի քանի հազար համախոհներ:
Իր ելույթում Պորոշենկոն կոչ է արել Զելենսկուն անհապաղ ժամանել մարզադաշտ, հակառակ դեպքում ինքը նրան ամեն օր կհրավիրի հեռուստաեթեր: Դրանից հետո հավաքվածները սկսել են վանկարկել. «Վոլոդյա, դու՛րս արի»:
Կարդացեք նաև
Իր ընդդիմախոսին սպասելիս Պորոշենկոն պատասխանել է լրագրողների հարցերին: Այսպես, նա խոստացել է, որ եթե երկրորդ փուլի արդյունքում հաղթի Վլադիմիր Զելենսկին, ինքը կընդունի քվեարկության արդյունքները:
«Եթե, Աստված մի արասցե, նա ընտրվի, դա կլինի ուկրաինացի ժողովրդի ընտրությունը: Եվ ես դա կհարգեմ»,- ասել է Պորոշենկոն:
Պատրաստեց՝ Վիկտորյա ԱՆԴՐԵԱՍՅԱՆԸ
