«Հոգեկան առողջության պահպանման ազգային կենտրոնի» շահառուները հեռախոս կունենան, նրանք կկարողանան իրենց տրված հեռախոսներով ցանկացած պահի զանգահարել մարդու իրավունքների պաշտպանի գրասենյակ եւ ներկայացնել իրենց խնդիրները: Այս մասին այսօր լրագրողներին ասաց կենտրոնի տնօրեն Սերգեյ Խաչատրյանը: Նա ասաց, որ հատուկ պահվող հիվանդներն իրենց սենյակներում ունեն ֆիքսված հեռախոսակապ, որն ավտոմատ միանում է ՄԻՊ գրասենյակին:
Նա վստահեցրեց, որ հիվանդները կստանան նաեւ զուգարանի թուղթ, ինչը նախկինում չէին ստանում, հարազատներն էին բերում:
Խաչատրյանն ասաց, որ հիվանդների սննդակարգն էլ հարմարեցվել է նրանց կարիքներին՝ օրական 3 անգամ.«Սննդի հարցը լուծված է: Ընդ որում, գրաֆիկը շեղել ենք այնպես, որ իրենք են խնդրում, որ չսովածանան։ Դեղորայքը ստանալուց հետո սովի զգացում է առաջանում, մենք հարմարացրել ենք իրենց: Կարծիքը հաշվի ենք առնում, օրինակ՝ սիսեռից շատերը հրաժարվում են, հանել ենք, ուրիշ բան ենք տալիս»:
Խաչատրյանի խոսքերով՝ կենտրոնի կոյուղու համակարգը նախկինում չէր գործում, կոյուղաջրերը լցվում էին շենքերի նկուղները ու գարշահոտ տարածում, հիմա այն փոխվել է, եւ ամբողջ կոյուղու համակարգը գործում է, ինչպես նաեւ սկսել է լիարժեք գործել կենտրոնի լաբորատորիան.«Հիմա ունենք բիոքիմիական անալիզատոր»:
Կարդացեք նաև
Խաչատրյանն ասաց, որ կենտրոնում հիմա կա արտթերապիա, հիվանդները մասնակցում են երգի, պարի խմբակներին, մասնագիտությամբ իրավաբան սոցիալական աշխատողը հիվանդների հետ դասընթաց է անցկացնում, կազմակերպվում են համերգներ:
Նելլի ԲԱԲԱՅԱՆ
