Այսօր ԱԺ-ում 2018-ի բյուջեի կատարման հաշվետվության քննարկումը շարունակվում է:
«Լուսավոր Հայաստան» խմբակցության պատգամավոր Արկադի Խաչատրյանը արտգործնախարար Զոհրաբ Մնացականյանին հարցրեց. «Հայտնի խոսք կա՝ որքան շատ ես ներդնում դիվանագիտության մեջ, շատ ավելի քիչ անհրաժեշտություն կլինի ներդնել զենքի մեջ: Արդյոք համարո՞ւմ եք, որ մեր դիվանագիտությունը պատշաճ ձեւով ֆինանսավորվում է, հատկապես մեր դիվանագիտությունը աշխարհաքաղաքական կենտրոններում»:
Նախարարը պատասխանեց. «Երբեք բավարար չի լինելու: Դա մշտական բանավեճ է ցանկացած երկրում: Մենք պետք է գնահատենք ու հասկանանք, որ ունենք ֆինանսական կարողությունների ինչ-որ ծավալ, մեր ներքին բարեփոխումների գործընթացը շարունակական գործընթաց է, որի իմաստը մեկն է՝ ռեսուրսների արդյունավետ օգտագործում»:
Նախարարն ասաց, որ 2020-ի բյուջեի համար նոր ձեւաչափեր են գտնելու, որ գործառույթների տնտեսական մասը ուժեղացնեն ու ավելի արդյունավետ օգտագործեն եղած ռեսուրսները:
Կարդացեք նաև
Մանե Թանդիլյանին չէր բավարարել նախարարի պատասխանը՝ կապված վիզաների ազատականացման ռեժիմի մեկնարկի ժամկետների հետ: Նա հարցրեց. «Ես այդպես էլ չհասկացա՝ մենք ե՞րբ ենք նախատեսում ունենալ ազատականացված վիզայի ռեժիմ ԵՄ-ի հետ: Իհարկե, հասկանում եմ, որ աշխատանքներ են տարվում, բայց հենց այդ աշխատանքների արդյունավետությունը գնահատելու համար մեզ պետք է ժամկետ»: Նա նաեւ հարցրեց, թե ե՞րբ են նախատեսում ԵՄ-ՀՀ համաձայնագրի վավերացման գործընթացը ԵՄ անդամ երկրների կողմից:
Մնացականյանը վիզաների ազատականացման հետ կապված պատասխանեց. «Շատ դժվար է ինձ պատասխանել, հարցը վերաբերում է ԵՄ անդամ պետություններին,, իրենց դիմադրությանը: Սա ընթացք է, որը մենք պետք է ճեղքենք: Ես չեմ կարող ասել՝ մեկ ամսվա ընթացքում, երեք, թե մեկ տարվա ընթացքում: Սա մեզ համար գերակա է: Չեմ ուզում այդ բառն օգտագործել՝ պայքար, սա գործընկերների միջեւ գործընթաց է, որտեղ մեր գերակա խնդիրն է ճեղքել այդ պատը: Չկա այդ ժամկետը: Իրենք իրենց հանձնառությունը տվել են փաստաթղթում, կա դա: Ունենք աջակցություն տարբեր անդամ երկրների կողմից: 28 անդամ պետությունների մեջ կան երկրներ, որ շատ ավելի պահպանողական են: Ոչ բոլորն են 28-ի մեջ այդ մոտեցումը կիսում: Հիմա այսպես է, շարունակելով՝ պիտի հասնենք մեր նպատակին»:
Ինչ վերաբերում է համաձայնագրի վավերացմանը՝ նախարարն ասաց, որ այդ գործընթացը որեւէ քաղաքական խոչընդոտներ չունի, սովորական ընթացակարգերով անցնում է:
Հռիփսիմե ՋԵԲԵՋՅԱՆ
