«Ադրբեջանն առանց հայտարարելու՝ զորավարժություններ մեկնարկեց, սա «դեմարշ» չէ՞ր միջազգային հանրության, Արցախի եւ ՀՀ-ի դեմ: Սա առիթ չէ՞ դիմելու ՄԱԿ-ի անվտանգության խորհրդին»,-ԱԺ-ում 2018թ.-ի բյուջեի կատարողականի ներկայացման ժամանակ այսօր ԱԳ նախարար Զոհրաբ Մնացականյանին այսպիսի հարցադրում ուղղեց ԲՀԿ պատգամավոր Տիգրան Ուրիխանյանը: Զոհրաբ Մնացականյանը պատասխանեց. «Այդ հարցը մաս է կազմում ավելի լայն մտավախությունների, որոնք կապված են տարածաշրջանային անվտանգության եւ կայունության հետ: Այն առնչվում է ԵԱՀԿ-ին: Հարցը բարձրաձայնվում է ամենուր՝ միջկառավարական եւ խորհրդարանական համագործակցության շրջանակներում: Այս հարցում ձեւաչափը եւ հարթակը ԵԱՀԿ-ն է, որի շրջանակում հարցը բարձրաձայնված է»:
Տիգրան Ուրիխանյանն արձագանքեց. «ԱԳՆ-ն ի՞նչ միջոցով է ԵԱՀԿ-ում հարցը դրել եւ ի՞նչ պատասխանի է սպասում: Պետք է մատնանշել, որ աշխարհի դեմ է նման հանցագործություն տեղի ունենում»: Զոհրաբ Մնացականյանը շեշտեց. «Մենք ունենք մշտական մարտահրավեր՝ տարածաշրջանային անվտանգության հետ կապված, ձեր մատնանշածը մեկ խնդիրն է միայն: Մեր քաղաքականությունը վերաբերում է Արցախյան հակամարտության խաղաղ կարգավորմանը, ինչի հանդեպ եւս այդ զորավարժությունները մարտահրավեր են»:
Հիշեցնենք, որ Ադրբեջանը Թուրքիայի հետ համատեղ հերթական զորավարժություններն անցկացնելու է հունիսի 7-11-ը:
Լուիզա ՍՈՒՔԻԱՍՅԱՆ