Փրփրուն գինիները, կամ ինչպես սովորաբար ասում ենք՝ շամպայնները (թեեւ շամպայն անունը կրելու իրավունք ունեն միայն Ֆրանսիայի Շամպայն տարածաշրջանում արտադրված փրփրուն գինիները) կարող են ոչ միայն տոնական մթնոլորտ հաղորդել տարբեր առիթների դեպքում, այլեւ օգտագործվել գեղեցիկ եւ համեղ կոկտեյլների մեջ: Ներկայացնենք երկու կոկտեյլի բաղադրատոմս՝ փրփրուն գինով:
Ապերոլ շպրից
Այս իտալական կոկտեյլի պատրաստման համար հարկավոր է.
Ապերոլ (իտալական վերմուտի տեսակ է՝ հայտնի իր կրակագույնով)- 2 բաժին
Կարդացեք նաև
Փրփրուն գինի (ընդունված է իտալական պրոսեկոն, սակայն կարելի է վերցնել ցանկացած փրփրուն գինի)- 3 բաժին
Հանքային ջուր կամ քաղցր, անգույն գազավորված ըմպելիք՝ սփրայթ, տոնիկ- 1 բաժին
Նարնջի կտորներ
Սառույց
Կոկտեյլը կարելի է մատուցել ինչպես գինու բաժակների, այնպես էլ՝ high ball տեսակի բաժակների մեջ: Բաժակի մեջ լցրեք մի քանի կտոր սառույց, մի քանի կտոր նարինջ, վրան՝ ապերոլը, ապա՝ փրփրուն գինին, վերջում՝ տոնիկը:
Կիր ռոյալ
Իսկ այս մի կոկտեյլը ֆրանսիական է, եւ նրա պատրաստման համար անհրաժեշտ է.
Փրփրուն գինի -3 բաժին
Կասիս (cre’me de cassis)- 1 բաժին
Կասիսն իրենից ներկայացնում է սեւ հաղարջի լիկյոր, այն շատ նուրբ բուրմունք եւ համ է տալիս փրփրուն գինուն:
Շամպայնի լավ սառեցրած երկար կամ տափակ բաժակի մեջ լցրեք կասիսը, ապա մինչեւ վերջ՝ փրփրուն գինին: Առկայության դեպքում մատուցեք բաժակի եզրին ելակ կամ հաղարջի ողկույզ դրված:
Բարի վայելում:
Պատրաստեց Մելանյա ԲԱՐՍԵՂՅԱՆԸ
