Ադրբեջանում Ֆրանսիայի գործերի ժամանակավոր հավատարմատարին կանչել են ԱԳՆ՝ ֆրանսիացի խորհրդարանականների Արցախ կատարած այցի պատճառով: Ինչպես հաղորդում է haqqin.az-ը՝ վկայակոչելով գերատեսչության մամուլի ծառայությունը, Ադրբեջանի ԱԳՆ-ը դատապարտել է ֆրանսիացի խորհրդարանականների այցը Արցախ:
Բողոքի նոտայում նշվում է, որ նման այցերը «խափանում են ԵԱՀԿ Մինսկի խմբի համանախագահների, այդ թվում՝ Ֆրանսիայի ջանքերը՝ ուղղված հակամարտության խաղաղ կարգավորմանը»: Ադրբեջանի ԱԳՆ-ը Ֆրանսիայի կառավարությանը կոչ է արել խիստ միջոցներ ձեռնարկել՝ խորհրդարանականների այցերը դեպի Արցախ կանխելու համար:
Հիշեցնենք, որ սեպտեմբերի 10-ին եռօրյա աշխատանքային այցով Արցախի Հանրապետություն էր ժամանել Ֆրանսիայի խորհրդարանականների պատվիրակությունը (լուսանկարում):
Պատրաստեց՝ Վիկտորյա ԱՆԴՐԵԱՍՅԱՆԸ
