Լրագրողները ՀՖՖ արտահերթ ժողովի ընթացքում ՀՖՖ գործկոմի նախկին անդամ, Հենրիխ Մխիթարյանի մայրիկից՝ Մարինա Թաշչյանից, հետաքրքրվեցին վարչապետի խորհրդական Մեսրոպ Առաքելյանի, որը ՀՖՖ Ներքին աուդիտի և համապատասխանության կոմիտեի նախագահն է՝ այն հայտարարության մասին, թե պետք է Հենրիխ Մխիթարյանի ձեռքից ավագի թեւկապը վերցնել. «Ավագի փոփոխություն, ով այսօր մեղմ ասած թքած ունի հավաքականի վրա»: Ինչպե՞ս է սա մեկնաբանում եւ արդյո՞ք այս խնդիրը որդու հետ քննարկել է:
«Ճիշտն ասած, որդուս հետ չեմ քննարկել, որովհետեւ չեմ էլ ուզում այդ հարցը բարձրացնել, որպեսզի իրեն վատ չզգա: Ես ինքս եմ զանգահարել ֆեդերացիա եւ պահանջել եմ, որպեսզի, եթե չեմ սխալվում, պարոն Առաքելյանի, այդ հարցազրույցին ֆուտբոլի ֆեդերացիան արձագանքի: Եվ միայն իմ զանգից հետո նրանք արձագանքեցին: Ես գտնում եմ, որ ֆուտբոլի ֆեդերացիան, եթե իսկապես ֆեդերացիա է, այդ մարդուն պետք է խայտառակի»:
Հարցին՝ մտավախություն չունի՞, որ իր հայտարարությունները ֆեդերացիան կարող է որդու՝ Հենրիխ Մխիթարյանի դեմ օգտագործել, Մարինա Թաշչյանը պատասխանեց հայտարարությամբ. «Ֆեդերացիան Հենրիխի դե՞մ: Թող օգտագործի: Դա միայն իրենց վնաս կտա: Արդեն օգտագործել են: Եթե գտնում են, որ Հենրիխին չպետք է հրավիրեն հավաքական, թող չհրավիրեն: Այդպիսի խոսակցություններ եղել են մարզչական շտաբի հետ: Ավելի հիմա չեմ խոսի»:
Աշոտ ՀԱԿՈԲՅԱՆ
Կարդացեք նաև
Հ. Գ. Հայաստանի ֆուտբոլի ֆեդերացիայի նորընտիր նախագահ Արմեն Մելիքբեկյանը հերքել է Մարինա Թաշչյանի այդ պնդումը, թե ՀՖՖ-ում խոսակցություններ են եղել հավաքականում Մխիթարյանի չխաղալու վերաբերյալ. «Հնարավոր չի նման բան, որովհետեւ ա/ես չեմ կարող նման բան մտածել անգամ, եւ բ/Հայաստանի հավաքականի կազմն ընտրում է մարզիչը: Եվ ես չեմ պատկերացնում մի մարզչի, որն այսօր Հենրիխ Մխիթարյանին չի հրավիրի հավաքական: Ես կարծում եմ՝ դա ուղղակի էմոցիոնալ հայտարարություն էր: Ես շատ հարգում եւ սիրում եմ Մարինա Թաշչյանին, բայց նման բան, իհարկե, գոյություն չունի»:
