Վարչապետ Նիկոլ Փաշինյանը քիչ առաջ ֆեյսբուքյան իր էջում ուղիղ եթերով անդրադարձավ Ամանորի տոնական միջոցառումներն անցկացնելու համար հատկացված գումարին եւ դրա արդյունքներին: Փաշինյանն աննախադեպ համարեց ծախսած գումարից ստացած արդյունքները:
Վարչապետը հիշեցրեց՝ կառավարությունը 271 միլիոն դրամ էր հատկացրել Երեւանի քաղաքապետարանին՝ մայրաքաղաքում տոնական միջոցառումների համար, սրա նպատակն էր՝ զբոսաշրջիկների եւ տեղացիների համար Երեւանում Ամանորն ավելի գրավիչ դարձնել:
Փաշինյանը արդյունքները թվերով ներկայացրեց. «2019 թվականի դեկտեմբերի 28-ից մինչեւ 2020 թվականի հունվարի 6-ն ընկած ժամանակահատվածում, նախորդ տարվա նույն ժամանակահատվածի համեմատ՝ 9 միլիարդ 307 միլիոն դրամի հավելյալ դրամաշրջանառություն է եղել: 271 միլիոն հավելյալ ծախսելով, կարող ենք ենթադրել, որ 9 միլիարդ ավելի դրամաշրջանառություն է եղել: Սրանից մոտ 4 միլիարդը տեղի է ունեցել ՀՀ մարզերում: Այս իրավիճակի վերլուծությունն ասում է՝ այդ գումարը ծախսելով՝ մեր հայրենակիցներին ու զբոսաշրջիկներին մղել է, քաջալերել է Ամանորին եւ Սուրբ Ծննդյան օրերին գալ Երեւան, 1-2 միջոցառումներին մասնակցելով՝ նրանք գուցե այցելել են մարզեր՝ իրենց հարազատներին տեսնելու, տեսարժան վայրեր այցելելու: Հունվարի երկուսին երեխաների հետ բարձրացանք Սեւանավանք, ու զարմացած էի, թե ինչ մեծ թվով զբոսաշրջիկներ կային, ու նաեւ՝ օտարերկրյա: Եկել էին Սեւանն ու Սեւանավանքը դիտելու»:
Փաշինյանն ասաց՝ 9 միլիարդից 4 միլիարդը ծախսվել է մարզերում. «Ու այդ գումարը գնացել է փոքր կրպակներին, տաքսու վարորդներին, չնայած տաքսու վարորդների շրջանառությունն այստեղ չկա, ենթադրվում է գումարն ավելին է: Եվ այսպիսով, փոքր բիզնես ունեցողներին օգնել ենք հավելյալ եկամուտներ գեներացնել»:
Կարդացեք նաև
Վարչապետի հավաստմամբ՝ ամենամեղմ հաշվարկներով 9,3 միլիարդ հավելյալ առեւտրաշրջանառության արդյունքում 325 միլիոն հարկ է գեներացվելու:
Նա վստահեցրեց՝ մյուս տարի ավելի լայնածավալ ծախսեր պետք է անեն:
Ապա Փաշինյանը ներկայացրեց, թե որ մարզում հավելյալ առեւտրաշրջանառությունը որքան է կազմել՝ Արագածոտնում՝ 268 միլիոն դրամ, Արարատ՝ 254 միլիոն, Արմավիր՝ 1 միլիարդ 777 միլիոն, Գեղարքունիք՝ 228 միլիոն, Լոռի՝ 249 միլիոն, Կոտայք՝ 416 միլիոն, Շիրակ՝ 342 միլիոն, Սյունիք՝ 124 միլիոն, Վայոց ձոր՝ 108 միլիոն, Տավուշ ՝ 79 միլիոն դրամ:
«Զրո լումայի կորուստ ունենալով՝ ապահովեցինք 9 միլիարդ 307 միլիոն դրամի հավելյալ դրամաշրջանառություն»:
Զրույց քաղաքացու հետ. Ամանորյա պետական ծախսեր:
Gepostet von Nikol Pashinyan / Նիկոլ Փաշինյան am Dienstag, 21. Januar 2020
Նելլի ԲԱԲԱՅԱՆ
