«Վերջին օրերի իրադարձություններից համոզվեցինք, որ օլիգարխիան ջախջախված չէ: Հակառակը, օլիգարխիան շարունակում է պահպանել ազդեցությունը իշխանության տարբեր ճյուղերի, այդ թվում՝ դատական, որոշ առումներով՝ քաղաքական, չխոսենք մամուլի եւ այլ ոլորտների վրա: Հայաստանի պետականության դեմ պատերազմ է հայտարարված ու այդ պատերազմում օգտագործում են բոլոր թույլատրելի ու անթույլատրելի միջոցները», – այսօր ԱԺ հայտարարությունների ժամին ասաց ԱԺ պատգամավոր Արման Բաբաջանյանը:
Նա նշեց, որ այդ «պատերազմն» ուղեկցվում է ներքին ու արտաքին մի քանի աղբյուրներից սնվող հարձակումներով ու համեմատություն տարավ 1999-ի Հոկտեմբերի 27-ի հետ՝ ասելով, որ ժողովրդին հայտարարված պատերազմ տեսել ենք նաեւ այդ փուլում, Մարտի 1-ից առաջ եւ հետո. «Միակ տարբերությունն այն է, որ պետության ու ժողովրդի դեմ պատերազմ հայտարարողներն այն ժամանակ ունեին իշխանություն, իշխանական ու պետական աշխատասենյակներից էին հանդես գալիս, իսկ հիմա ոչ իշխանական պսեվդոընդդիմության դիրքերից են հանդես գալիս»:
Ըստ Արման Բաբաջանյանի, այդ պատերազմի դեմ պետք է պայքարել ու դա պետք է սկսել առաջնագծում դարանակալած թշնամու ոչնչացումից: Նա խոսեց սահմանադրական ճգնաժամը հաղթահարելու, սահմանադրական հանրաքվեի մասին: Բաբաջանյանի խոսքով՝ ԱԺ-ն պետք է արձագանքի մեր երկրում դավաճանական խմորումներին ու գործընթացներին:
Կարդացեք նաև
Հռիփսիմե ՋԵԲԵՋՅԱՆ
