Երեւանի պետական համալսարանն առայսօր հոգաբարձուների խորհուրդ չունի, իսկ մարտի 23-ից անորոշ ժամկետով հետաձգված ԵՊՀ ռեկտորի ընտրության հարցը մնում է առկախ, քանի որ հենց ԵՊՀ խորհուրդն է ռեկտոր ընտրում:
Aravot.am-ի հետ զրույցում ԵՊՀ նախկին գիտքարտուղար, նախկին պրոռեկտոր Մենուա Սողոմոնյանն ասաց, որ խորհրդի լիազորությունների ժամկետը վաղուց լրացել է: Ապա հավելեց. «Պետք է կամք լինի, կամք դրսեւորվի ու վերջապես անցկացվի ԵՊՀ հոգաբարձուների խորհրդի արագ ընտրություն»:
Հարցրինք՝ ո՞ւմ կողմից պետք է կամք դրսեւորվի: «Խորհրդի կազմը ձեւավորվում է հետեւյալ սկզբունքով՝ 25 %-ը կառավարության ներկայացուցիչներն են, 25 %-ը ՝ ԿԳՄՍ նախարարության, 25 %-ը ԵՊՀ պրոֆեսորադասախոսական կազմն է, 25 %-ը ՝ ուսանողության ներկայացուցիչները: Պետք է կառավարությունից գա համապատասխան առաջարկ, որ ներկայացրեք ԵՊՀ-ի հոգաբարձուների խորհրդի ձեր ներկայացուցիչներին, նաեւ միաժամանակ Կառավարությունը եւ ԿԳՄՍ նախարարությունն իրենց ներկայացուցիչներին ներկայացնեն, ապա վարչապետը հաստատի հոգաբարձուների խորհրդի կազմը, հոգաբարձուների խորհուրդն էլ շատ արագ ժամկետում փորձի ռեկտորի ընտրություն անցկացնել»,-պատասխանեց պրոռեկտոր Մենուա Սողոմանյանը:
Հարցրինք՝ հնարավո՞ր է նոր ուսումնական տարին ԵՊՀ-ն դիմավորի առանց ռեկտորի: «Իհարկե դա շատ վատ է, բայց ոչ մի բան չեմ կարող բացառել, որովհետեւ ոչնչի մասին հստակ չի ասվում: Ասում են՝ արդեն քանի է ամիս է պարետատան հետ համաձայնեցնելով աշխատանքներ ենք տանում, որ հասկանանք հոգաբարձուների խորհուրդը ոնց ձեւավորենք, եւ այլն, եւ այլն, նիստ անցկացնենք… Այդտեղ կարծես բարդ բան չկա, այնպես որ, եթե ցանկություն ունի, կարելի է տասը օրվա մեջ էլ այդ ամեն ինչը կազմակերպել»,-պատասխանեց նախկին պրոռեկտորը:
Կարդացեք նաև
Հարցրինք՝ հնարավոր չէ՞ առցանց ձեւաչափով նիստ գումարել: «Չեմ կարծում, ի վերջո փակ, գաղտնի քվեարկություն պետք է տեղի ունենա: Առցանց տարբերակով փորձառությունը չի եղել նման բան կազմակերպելու»,-ասաց մեր զրուցակիցը:
Մեր հարցին՝ այսինքն ստացվում է հապաղելը կառավարության, ԿԳՄՍ նախարարության կողմից է, Մենուա Սողոմանյանն այսպես պատասխանեց. «Եթե հարցը լուծվի, համալսարանը կտա հոգաբարձուների խորհրդի իր թեկնածությունները»:
Գոհար ՀԱԿՈԲՅԱՆ
