«Նուբարաշեն» ՔԿՀ-ի նախկին պետ Սամվել Մկրտչյանի ձերբակալման արձանագրությունը բողոքարկվել է դատարան:
Այս մասին «Հայկական ժամանակ»-ի հետ զրույցում ասաց նրա պաշտպան Վահան Հովհաննիսյանը:
Հիշեցնենք՝ «Նուբարաշեն» ՔԿՀ-ի նախկին պետ Սամվել Մկրտչյանը ձերբակալվել է պաշտոնեական լիազորությունները չարաշահելու եւ պաշտոնեական կեղծիք կատարելուն դրդելու կասկածանքով: Ըստ ՀՔԾ-ի՝ կասկածանքը նույն հիմնարկի կալանավոր, որպես քրեական հեղինակություն հայտնի Վահագն Աբգարյանին մարմնական վնասվածք պատճառելու դեպքի առթիվ հարուցված քրեական գործի շրջանակում է:
Սամվել Մկրտչյանի պաշտպան Վահան Հովհաննիսյանը պատասխանել է գործի վերաբերյալ մի քանի հարցերի.
Կարդացեք նաև
– Պարո՛ն Հովհաննիսյան, ի՞նչ դիրքորոշում ունի Ձեր պաշտպանյալը կասկածանքի վերաբերյալ, ցուցմունք տվե՞լ է:
– Ցուցմունք չի տվել, դատավարական-քննչական գործողություններին հրաժարվել է մասնակցել: Ձերբակալումն էլ արդեն բողոքարկել ենք դատարան, 24 ժամվա ընթացքում պետք է քննվի:
– ՀՔԾ-ն հաղորդագրություն տարածեց, ըստ որի՝ Ձեր պաշտպանյալը փետրվարի 24-ին Վահագն Աբգարյանին խցից այլ սենյակ տեղափոխելու հրահանգ է տվել, որտեղ էլ նա ծեծի է ենթարկվել, ապա կազմել է տվել կեղծ փաստաթուղթ: Նկարագրվածի վերաբերյալ ի՞նչ կարող եք ասել:
– Դա կասկածանքի էությունն է, որն ամբողջությամբ, աներկբա իրականությանը չի համապատասխանում: Սամվել Մկրտչյանը այնքանով կապ ունի այդ հանցագործության հետ, որքան՝ մեզնից յուրաքանչյուրը:
Միլենա ԽԱՉԻԿՅԱՆ
Հոդվածն ամբողջությամբ՝ «Հայկական ժամանակ» օրաթերթի այսօրվա համարում:
