Մարտի 1-ի զոհերի իրավահաջորդները և նրանց ներկայացուցիչները սեպտեմբերի 7-ին լրագրողների հետ հանդիպման ընթացքում հայտարարեցին, որ դադարեցնում են իրենց ֆիզիկական մասնակցությունը դատական նիստերին:
«Մենք հույս ունենք, որ նշած բոլոր խնդիրները, դրանց հիմնական և առանցքային մասը շատ արագ կթիրախավորվեն, և դրանց լուծման ուղղությամբ կսկսվեն իրական գործընթացներ»,- ասաց Մարտի 1-ի զոհերի իրավահաջորդների պաշտպան, փաստաբան Տիգրան Եգորյանը։
Նրա խոսքով՝ դատախազությունը, դատարանները բավական արդյունավետորեն ձախողում են հատուկ քննչական ծառայության ձեռնարկած ջանքերը:
Իսկ դատարանում իրավիճակը, ըստ նրա, իրենց մասնակցությամբ չի պայմանավորված․ «Դրա համար պատասխանատու պաշտոնյանների պատշաճ գործունեությամբ պետք է այդ հարցերը կարգավորվեն։ Մեր չմասնակցությունը որևէ կերպ գործի այս կամ այն ուղղությամբ ընթանալուն չի նպաստելու։ Դրա համար պատասխանատուները բացառապես և միայն այդ գործընթացի համար պատասխանատու պետական մարմիններն են՝ մեղադրող կողմը, հանգամանքների բերումով գլխավոր դատախազությունը դարձել է մեղադրող կողմ, և նախագահող դատարանը, ինչպես նաև իրենց էական ազդեցությունն ունեն այս հարցի կապակցությամբ ողջ դատական համակարգը, և այդտեղ տիրող իրավիճակն ու իրադրությունը, այդ թվում նաև Բարձրագույն դատական խորհուրդը և Սահմանադրական դատարանը։ Այս բոլոր պետական մարմինները ամեն մեկն իր լիազորությունների շրջանակներում ունի առանձին խողովակներ, որոնք անխուսափելիորեն փոխկապակցված են այս գործի հետ։ Եվ այս գործը անխուսափելիորեն այդ խողովակներով հոսելու է այդ մարմիններ»։
Կարդացեք նաև
Ամի ՉԻՉԱԿՅԱՆ
